📌 持續更新！

呢版係我諗到乜就寫乜嘅，一次可能淨係會寫一小部份，敬請留意本頁面嘅持續更新！

我知道好多輸入法嘅運作原理，但可以流利用到嘅並唔多，嘸蝦米係其中之一（但目前已非本人主力）。喺本人深入嘅研究之下，發現咗呢款輸入法（至少從佢嘅官方材料為出發點）嘅一啲唔完備嘅地方。

字根同鍵位

• 有好多實際上會用到嘅字根，喺官方字根表度未有列出。有啲民間資料會補返呢啲字根。
• 「戶」¹、「酉」、「臼」、「卜」等字官方文件聲稱佢哋嘅鍵位係從發音而嚟，但我冇搵到佢哋所依據嘅發音係乜。不過其他嘅音碼其實都冇好明確嘅取碼標準就係喇。
• 「喪」字都有「捨大根而不用」嘅嫌疑（「土口口𧘇」>「十口口𧘇」？），而且唔一定有符合大根原則嘅「容錯碼」。至於「囧」不攞「四」而攞做「囗儿ㄇ」或者「囗八ㄇ」，我哋可以定義「四」內部不可容物嚟解釋。

拆字

• 「主」字，我從來都唔明點解它拆做「丶王」而唔係「亠土」。（五筆同樣都拆做「丶王」，倉頡同行列就都係拆做「亠土」。嘸蝦米同五筆都有齊「丶亠土王」四個字根，點解唔係遵守大字根攞先嘅原則？）
• 嘸蝦米有「亼」字根，但「余舍」又唔用「亼」呢個大啲嘅字根而係拆做「人」。「余」有一個將首碼攞做「亼」嘅容錯碼，「舍」就冇將首碼攞做「亼」嘅容錯碼。更甚的是，官方並冇列出一個「余減走人」嘅字根，而係用「禾」嚟權充，而且補碼要攞做捺而唔係點（如果唔係會變做次選嘅容錯碼）。以上現象全部都可以類推到包含呢啲部件嘅字度。

兩碼字

• 「輿」有一個兩碼打法「CB」。呢個字一般習慣寫「𦥑（臼）」先再寫「車」，拆做「GCEB」，官方碼表亦將「GCEB」列為標準拆法，而「CGEB」為容錯碼。佢嘅兩碼打法「CB」列作「首尾碼」不妥。
• 「辭」字完整拆碼係「ETNL」，亦冇「辭」字嘅簡速字根，官方將兩碼打法「EJ」列作首尾碼疑有誤。
• 「瓜」字最後一筆似乎應該係捺而唔係點，官方碼表將兩碼打法「GA」列作標準取碼不妥。（但係「GN」又同「夾」撞咗，所以「GA」或者可以當硬性編碼留喺度。）
• • 其他帶有「瓜」部件嘅字如「孤狐」都有類似問題，補碼作 N 嘅容錯碼擠咗去次選位置。
• 「干」字按標準取碼，只可以拆做「GJ」，冇 V（附加 V 唔係標準取碼，只可以當係附加規則），官方將兩碼打法「GV」列作（標準取碼嘅）首尾碼不妥。
• 「艦」字嘅兩碼打法「GF」，官方列作「發音＋尾碼」，但佢個發音唔啱。
• 「或」字尾筆應該係右上角嘅點，而唔係橫，官方列作簡速字根嘅規則碼不妥。「武」字都有類似嘅問題，攞做 WE 而唔係 WA。以上字符都唔設末筆作點嘅「容錯碼」。
• • 實際上所有帶有「弋」或者「戈」部件嘅字都係咁。官方有提到咁樣嘅一條規則：「凡係帶有『弋』或者『戈』部件嘅字（包括呢兩個字本身），一律拎右上角嘅點先，然後攞『𫠠』或者『𭠍』，最後先至拎位於呢個部件左下方嘅部份。」但考慮到補碼取用嘅模糊性，或者都應該加返咁樣嘅一條附加規則：「凡係帶有『弋』或者『戈』部件嘅字（包括呢兩個字本身）要攞補碼時，一律考慮咗位於左下方嘅部件先，然後先至去考慮喺『𫠠』或者『𭠍』攞補碼」。咁樣一嚟所有帶「弋」或者「戈」嘅字就都完整咁解釋得到喇。
• 有四個字，存在兩種兩碼字嘅打法：力 DX DY、門 MI MY、牙 XP YP、乙 ZL ZZ。官方文檔又話，同一個字掗住兩個兩碼碼位（加 V 嘅唔算）係浪費編碼空間，並以此為據將部份早期版本嘅兩碼字改咗佢（儘管更改兩碼字嘅「常用度」標準可能有主觀之嫌），但又唔知點解留低咗四個「浪費編碼空間」嘅兩碼字喺度。

其他

• 部份字符繁簡體模式分配欠妥。我有打粵語字嘅需求，例如「瞓」、「劏」等字，明明字形上係繁體，嘸蝦米又規定呢個字必須要轉去簡體模式先打到。

💡 BlogBlog 同樂會！

呢篇係我嘅「BlogBlog 同樂會 - 2026 年 7 月」嘅投稿文章。今個月嘅主題係「有趣的小知識或冷門概念」，由劉昕主持。如果你有自己嘅部落格，歡迎一起嚟參加！

以下講吓幾個奇怪嘅漢語方言¹現象。

ㄣㄥ（en in & eng ing）不分

Wiwi 喺佢篇文「三個怪癖」 度提到佢講嘢嘅時候有ㄣㄥ不分嘅現象。據說呢樣係台灣人嘅普遍現象²，而且其實唔淨止台灣係咁，就連大陸某啲地方（主要係南方）嘅人都有。為咗解決打字方面嘅困擾，大陸的好一啲輸入法甚至有「模糊音」嘅設計，無論打邊種（用戶覺得分唔到嘅）組合都出到字。

耐人尋味嘅係，閩南語有個類似ㄧㄥ嘅韻母（白話字 eng，臺羅 ing），傳統上應該要讀做 [i̯əŋ]，同ㄧㄣ有明顯唔同。喺北方漢語入面，ㄧㄥ韻母往往被讀做 [i̯əŋ] 甚至 [i̯ə̃]，而ㄧㄣ就係 [in]。反倒係一啲其他嘅南方漢語的確存在上述ㄣㄥ不分嘅特徵。

閩南語真係保留入聲嘅語言？

好一啲閩南沙文主義狂熱份子自詡閩南語係「保留入聲」嘅古漢語。但據我一個粵語母語者嘅個人觀察，台灣嘅閩南語使用者實際上普遍存在入聲脫落嘅現象，好多字典入面標明係入聲嘅字已經被發音到同開韻尾冇乜分別，除非下一個字以零聲母開頭形成聯誦。不過少數字正腔圓嘅人又真係有好好將入聲韻尾讀出嚟。語言隨住時間推移而出現自然變化係件正常嘅事，但係唔應該將某啲正喺度變化（且瀕臨消失）嘅特徵誇大成某語言存古嘅證據。

想節能，輪胎能

好多年前有一個廣告當中有句對白「想節能，輪胎能」，因為代言人古天樂普通話太差而被空耳成奇奇怪怪嘅嘢。不過耐人尋味嘅係，喺普通話同埋標準粵語當中，「輪」跟「能」都係唔同音㗎，反而係一啲鄉下地方嘅粵語方言係分唔到。古天樂喺講粵語嘅時候應該都係分到嘅~~（如果唔係一早就被聽出口音喇）~~。順帶一提，「出」同「七」嘅歸併同上述嘅歸併其實是平行嘅，於是「出街瞓」就變咗做「七街瞓」。

粵語嘅平翹音

唔知有冇人深入探究過呢個疑問。話說 100 年前嘅廣州話係有分平翹音嘅（雖然所謂嘅翹舌音，捲舌幅度遠遠少過北方漢語，若干字歸類同現代標準漢語³唔同），而家嘅標準粵語就唔再分。好多文獻寫「而家統統讀做平舌」，我是好懷疑嘅。根據我自己嘅個人語感、以及對身邊人發音嘅觀察，大多數香港人（冇留意大陸嘅）嘅粵語發音當中實際上係有兩套塞擦音㗎，但唔再構成音位對立，形成同位異音（allophone，少數人係自由變體 free variation），喺「圓唇元音」（粵拼 o, oe, eo, u, yu）前讀作 [tʃ tʃʰ ʃ]，而喺「非圓唇元音」（粵拼 aa, a, e, i）前讀作 [ts tsʰ s]。⁴假如唔遵守上述法則，雖然唔會影響理解，但可能會被認為口音同一般香港人唔一樣。

💡 集思廣益！

唔知各位讀者有冇想增補嘅項目？歡迎透過電郵或私訊向本人提出！

1. 打尖
2. 隨地便溺
   • 實際上呢個係一種極其古老嘅標記領地手段，喺唔同嘅物種都有發現類似嘅行為，佢啲歷史遠遠超過五千年。另可參考「世界都是中國的」。
3. 喺公眾場合大大聲睇抖音／小紅書
   • 播得夠大聲先可以畀人注意並領略到中華文化嘅奧妙！
4. 喺異國他鄉迫人講普通話
   • 中國人鍾意喺異國他鄉迫人講普通話，哪怕對方個樣根本就唔似華人。
   • 你整遊戲、寫漫畫嗰陣，你冇出中文翻譯嘅話，你就係唔關照中文玩家。
5. 隨機被乳滑
   • 古語有云：人生中必定會經歷嘅三樣嘢：出生、死亡同乳滑。
6. 大興核酸
7. 世界都是中國的
   • 中國，一點也不能少！

💡 BlogBlog 同樂會！

呢篇係我嘅「BlogBlog 同樂會 - 2026 年 3 月」嘅投稿文章。今個月嘅主題係「理想的日常」，由支共喉舌 Alex Hsu 主持。如果你有自己嘅部落格，歡迎一起嚟參加！

理想嘅作息

1. 我之前有喺另一篇文度提過，本人嘅生理時鐘處於一個極其微妙嘅狀態，導致我喺尋求「正常」（合乎社會常規）嘅工作極度困難。我自己就曾經嘗試強行堅持咗朝十晚六嘅返工模式幾個月，睡眠狀況都仲係好飄忽，並唔總係喺嗰種適宜返工嘅狀態。但係我又唔鍾意喺深夜出門（感覺唔太安全）。睇嚟我只能去搵一些 freelancer 性質的工作？不過以香港而家嘅經濟環境而言，呢種性質嘅工而家已經唔係咁容易搵到喇，好難以咁樣嘅工去長期維持生計（呢一點得到咗長期以 freelance 作為主要收入來源嘅友人證實）。當然如果能將自己嘅生理時鐘較返正常咁就最好，但係我又應該點做呢？唔通要用醫療手段介入？
2. 我一直以來都唔係一個鍾意運動嘅人，甚至可以話係有啲討厭。可能係我嘅體能狀況差得滯。聽講咁嘅諗法好違反社會常規，唔知係咪需要矯正。當然如果社會上嘅其他人願意接受我咁樣嘅諗法咁就最好。

理想嘅人際關係

我嘅人際關係一直都係澩澩嫪嫪（laau2 laau2 gaau6 gaau6） 。或者我應該搵啲團體活動畀自己充實一下嘅。但係喺我討厭運動嘅前提下，我搵得到嘅活動種類就比較有限喇。而且我對陌生人嘅信任度好低，我自己一個出去搵合適嘅團體活動好怕會遇到騙子，所以我基本上只會透過僅有嘅人際網絡嘅介紹先會主動參加。而且喺我搵得到穩定嘅工作之前，我亦都唔可以太過燒錢。

不過我又唔鍾意參加人數太多嘅團體活動，如果唔係我好容易會變電燈膽。兩三個人一齊係對我嚟講最舒服嘅狀態。

理想嘅社會制度

1. I 人友善：雖則話我一直都有離開香港去外國生活嘅憧憬，不過礙於經濟因素喺可見嘅將來唔係咁可行。不過我唔知點解總係感覺歐美社會嘅運作方式唔係咁 I 人友善，喺歐美地區生活就意味住有更多需要我面對面同人交流嘅場合，而呢樣正正係我唔係咁擅長嘅。我唔知道有啲咩地方係啱我去闖下嘅。
2. 理想嘅工作環境：我係嗰啲唔係咁適應到一日就淨係得返工、放工同休息，生命被大量枯燥乏味嘅工作掗住、唔太重視 work-life balance 嘅生活模式，所以我未必好應付到全職工作？另外我自己偏好嘅工作風格係，如果我見到一樣嘢／一件事而家嘅 implementation 喺 suboptimal 嘅，而我又能諗到一啲具建設性嘅建議嘅話，我會期望我能夠對呢個問題積極發表意見，哪怕佢係我工作範圍之外嘅嘢。
3. 理想嘅工作效率：一個理想嘅社會，各項服務都應該具備良好且完善嘅 customer service。好唔好彩嘅係，我呢個人冇乜耐性，於是好容易就變成咗「律己以寬、待人以嚴」嘅狀態。我自己就有過好幾次需要搵 customer service 嘅狀況但對方工作效率好低之餘仲搞唔掂個問題，最後個問題搞唔掂不特只，仲搞到我情緒好鬼死差。

理想 = 唔現實？

寫到一半嗰陣留意到 Noa 同 Wiwi 提到，喺教育部國語詞典入面，「理想」嘅相反詞係「現實」。常言道「理想很豐滿，現實很骨感」，有得就一定必有其失。睇嚟或者我呢個理想係好難實現㗎喇。

結語

因為趕工嘅緣故，文章內容組織得唔係咁好，我以後可能會再原地更新呢一篇文。

我對於理想嘅世界、理想嘅社會制度，其實仲有啲更激進嘅諗法，不過我就唔喺度公開講喇，費事邊日呢個部落格或者就唔響處喇。

有啲人認為，漢字書法（下文簡稱書法）應該被納入義務教育體系，就好似而家嘅日本咁。香港而家嘅狀況係，教育局並冇對書法教育有做過啲咩規定，大部份學校都只係視書法為興趣班而非統一課程嘅一部份。其他大中華地區似乎都係類似咁樣嘅狀況？

個人淺見

現代人越嚟越少揸筆確實係一個問題。現代有好多人一叫佢哋揸起支筆，往往就好容易遇上執筆忘字嘅情況，或者係字體難以閱讀。但係現代人又好少能夠喺義務教育體系入面獲得「書寫端正」嘅系統性指導，於是乎好多人往往就會焗住得過且過。試諗下，喺古代科舉制度嘅年代，人哋對於「字體端正」嘅標準係非常之高㗎（雖然當時嘅識字率好低），字體唔端正即刻就會被視作失格。不過從另一個角度嚟睇，現代人又的確好少真係有需要經常揸起支毛筆，畢竟長期用極度消耗體力而且唔符合人體工學嘅方式寫字，對身體都會有負面影響（或者只係我學唔到正確嘅毛筆寫字方式先會咁樣講？）。

所以我嘅睇法係：有必要加強硬筆書法的教育，但不見得要加強毛筆書法的教育。

個人經歷

我喺香港教育體系入面嘅經歷比較唔係咁合理，但唔知算唔算「奇怪」（因為或者我嘅狀況其實係常態，只係係一種畸形嘅常態）。我讀小學嗰陣雖然冇統一教過（我亦冇上過書法興趣班），不過有件有啲詭異嘅事，小學每隔一段時間就會叫所有人求其寫少少嘢交上去，我絕大部份嘅時候都係敷衍了事。讀中學嗰陣我就基本完全冇掂過毛筆喇，僅僅喺初中嘅視藝堂（英文簡稱 VA）有過中國畫體驗，不過書法基礎薄弱嘅我就連自己個名都寫唔好（係指難以辨認嗰隻）。

我爹地媽咪喺深圳嘅「鴻××克」買咗啲鞋畀我，試咗好多鞋碼都唔係咁適合，而且都係左右窄，前後又反而幾充裕下。我得出咗咁樣嘅結論：大陸人嘅腳型同我唔太一樣，疑似仲停留喺紮腳嘅階段。

舊文

我有一篇原先發表喺 2018 年的半開玩笑嘅論述，原文如下：

話說在 1910 年代，有一群人看見人們讀文言文實在太辛苦了，於是便發起了白話文運動，可是直到現在，文言文仍然是中文義務教育（特別是大中華地區）當中的重要一環，仍然有不少人被迫為文言文而苦練、浪費光陰，而這些也不是他們感興趣的東西。社會的資源都被浪費在文言教育上（而且沒有甚麼實質用途，除了應付考試），造成現在的青少年的由於分心在文言而導致語文能力低下。所以由此可見，白話文運動是失敗的。

有人認為，要是沒有人再學習文言文，我們就會與五千年的中國文化和歷史割裂，持這些觀點的人認為，一旦文言文不再列入義務教育，就不會再有人學習文言文。可見我認為，這個世界上或多或少都會有一些對文言有興趣、有天分的人，他們可以替另一群沒有興趣的人去繼承這些歷史。文言文也可以作為選修科目，讓有興趣的人自行研究，而不是去強迫所有人去學習這門艱深的密碼。不是所有人都有這樣的能耐，於是導致他們不僅對文言失去興趣，令他們在各方面的能力或多或少有些影響，他們也有可能因為這樣而得上心理疾病，這樣長遠對社會的發展是很不利的。

既然白話文運動是失敗的，矯正文字的方法無效，何不矯正人們的口語，讓人們說文言文，讓文言作為人們的第一語言，這樣人們自然也能更高效地學好文言，也能符合白話文運動「我手寫我口」的初衷。

強迫所有學生學習自己母語以外的語言對不少人來說頗為辛苦，我認為讓他們專心學好一種語言能提高整體的語文能力，因為學生不用為其他外語（甚至密碼）而分心。想當年，香港曾出現「重英輕中」的社會風氣，可是他們沒有完全摒棄中文（或英文），導致學生們有雙重負擔，學習水平自然會下降。

那麼從現在開始，對下一代的文言教育作好打算吧！我們儘早應該為下一代以文言作第一語言鋪路！

託朋友翻譯出來的文言版本：

夫一九一零之際，或見人語文言者誠苦，則發白文之運，然今，文言仍中文義務教區之大者也，是猶以中原為甚，仍有苦習文言，光陰揮霍者甚蕃，而彼亦其無心者也。社稷之資，皆廢文言，且除應試外，實用之無，致今青年由之低語之能。由是，則知白文之運，敗也。

或以若無人習文言，则我輩失五千年華夏文化，絕史矣。執此見者以以為，若文言去義學，則無人習之。而余以為，是世果存趣於文言，質於文言者若干，彼等可代無趣於文言者承此史也。文言亦可為选修之科，請趣之者自研，而非迫人悉習此高深密碼。微人皆有是能，故致其不僅失趣，動於各面若干，更亦或因是而心疾染，長此以往，不利社稷進也。

今者白文之運既敗，正文之法不效，何不正人口語，使人語文言，以之正音，如是，則人自速習文言，亦切白文之運初云「我手寫我口」者耳。

迫悉生習外語，多人苦之。余以為，以學者無需分心於外語，甚至密碼者，使之專於一語之學，可拔其總語之能。觀夫香港舊日，現「重英輕華」之相，然彼等均盡未棄其二者之一，致其雙負，習能自下。

故今者語始於計慮後人之文言！後人以文言為語，我等當早路之！

而家嘅看法

八年過咗去，到底我嘅看法有冇變到呢？答案係：冇重大變化。

除非你係打算研究中國歷史文化，或者係打算當中文老師，否則文言文對「應試教育之後嘅」日常生活係一點用途都冇。你只需要足夠日常溝通程度嘅中文就可以應付日常生活了。

至於以後要喺屋企教仔女講咩話，咁就係另一個話題喇。

我自己私底下做 MBTI 測試，測試結果一直都係介乎於 INTP 同 INFP 之間（50 幾％嘅 T）。不過唔知點解，身邊人嘅評價清一色都係 INFP。

既然唔係典型嘅 T 或者 F，一啲可能適用於典型 T 人或者 F 人嘅論述，當然唔係完全適用於我。

最近參加咗一個討論 MBTI 嘅工作坊，裏面提到，NF 嘅人要「喺苦難中經歷神」¹，對於「衝出某區拓展業務」充滿興趣，呢啲都唔係我感興趣嘅。當中亦都有提到適合畀唔同人格類型嘅禮物：

• ST（實幹型）：有實用價值嘅物品，如現金。
• SF（助人型）：有心意、肯灌住心思入去嘅禮物。
• NF（理想型）：「有意義」嘅禮物，你隨便送啲垃圾然後作一個動人啲嘅故仔就得。
• NT（分析型）：新穎、有創意嘅禮物。

我個人反而對畀 NF 嘅禮物沒乜興趣，反而比較期望畀 NT 甚至 ST 嘅禮物，甚至覺得畀 NF 嘅禮物有啲荒謬。

學 Wiwi 話齋，戟住喺 T 和 F 中間咪幾好？

順帶一提個工作坊嘅座位劃分²變相要求啲 I 人全部坐哂去前面，有夠地獄。

最近有一個叫做 BlogBlog 同樂會 嘅社羣喺度不斷推廣 RSS 嘅好處，講到 RSS 可以幫助我哋擺脫演算法嘅控制之類，吹到 RSS 天上有地下無咁。介紹 RSS 優點嘅相關文章喺呢個社羣入面大把，我就唔列出嚟喇。之不過大家有冇諗過，RSS 係咪真係有大家想像中咁完美？

Pushing vs Polling

RSS 係一個只支持 polling 而冇得 pushing 嘅技術，咁意味住 RSS 閱讀器係需要不斷咁向提供 RSS 嘅網站攞資料，同 pushing 比起嚟，其實係會更加嘥網絡頻寬㗎，亦都會增加來源伺服器嘅負擔。而呢個問題，喺 AI 時代來臨之後嚴重咗。

網絡爬蟲之戰

喺 AI 時代來臨之後，啲網絡爬蟲為咗大規模拎數據訓練，開始變得唔講武德，連上古時代嘅君子協定 robots.txt 都一於唔理喇，，變相變咗做 DDoS，令全世界嘅網站管理員苦不堪言。面對呢個狀況，網站們祭出咗各種各樣嘅反制措施，有啲網站需要登入先用到某啲功能，或者啓用人機驗證做過濾，呢啲反制措施完全同 RSS 只支持 polling 嘅機制背道而馳，變相令全世界嘅 RSS 閱讀器都廢咗武功。

我哋使唔使憎恨 RSS？

我都唔知道。我會喺呢個部落格度照提供住 RSS 先，不過我心入面確實係有啲改良方向：

• 用 pushing，唔好用落後嘅 polling 方式更新資料
• 強化安全機制，防止 XSS
• 推動格式標準化
• 建立「先驗證後抓取」嘅機制，降低 polling 機制所帶來嘅 DDoS 負擔。咁都會為付費牆生態下嘅生存提供了改進。

💡 BlogBlog 同樂會！

呢篇文章嘅內容似乎幾切合 BlogBlog 同樂會 2026 年 2 月嘅主題「得我先係咁？」，可惜嚟遲咗！我居然一直到 3 月中先諗到寫作嘅靈感。

我由好細個嗰陣就一路覺得狗狗呲牙咧嘴個樣好得人驚，加上父母同我提到狗會咬人（雖然我應該從未被咬過），加上我覺得我無法控制小動物嘅行為（對人都夠吃力啦），一直到而家見到狗都會引發生理上嘅強烈不適（但只有真實望見犬隻先至會引發恐懼反應，望住相或者隔住個芒睇反而冇問題），導致我出門嘅時候不時遇到困難重重嘅情形。

唔知幾時開始，條街度越嚟越多人帶住自己隻狗進入商場嘅室內環境喇¹，媒體報導飼養寵物嘅人口出現上升趨勢，好多組織都積極推廣寵物友善設施，感覺就好似喺度同我呢種不善與寵物相處嘅人宣戰一樣。我真心覺得自己離「正常人」、被社會接受到嘅人越行越遠了。

每次出門時我都要擔心會唔會在路途上撞到狗隻、需唔需要因為撞到狗隻而兜大圈或者採取更危險嘅路徑（例如單車徑或者貼近馬路嘅一啲本身並非設計用作行人路嘅地方），而且我嘅恐懼反應同狗隻嘅體型係成正比㗎。有幾次行去唔係咁熟路嘅地方時，我嘗試咗好多唔同路徑結果都遇上大狗擋路嘅事，最後導致咗我喺條街度情緒崩潰嘅事。

驚狗係咪一種病？係咪要醫？