近一年來，「Wiwi 部落格宇宙」嘅一啲成員掀起咗投稿 nownownow.com 嘅熱潮， 令到我都不禁喺度思考，我係咪都要試吓投稿 nownownow.com？

不過我考慮咗下，睇嚟我都係暫時唔好住？

「Wiwi 部落格宇宙」入面有投稿 nownownow.com 嘅成員都係臺灣人。我嘅出生地同成長地都係喺香港，並且從來冇喺臺灣長住過，喺「Wiwi 部落格宇宙」之中算係個外邦人。nownownow.com 嘅香港部分目前有 10 人，而且初步睇咗一下全部都係英文網站，加上有人將「繁體中文」同「台灣」直接劃上等號，言下之意就係台灣以外嘅中文地區用嘅，應該都係殘體中文，我擺咗入去冇乜人睇嘅話就顯得有啲尷尬喇。

而且要投稿去 nownownow.com 嘅話，佢嗰度都會有啲關於你嘅基本資訊嘅問題要你答，你冇答到佢嘅話，你就會被列入 “missing photo” 或者 “missing profile questions” 裏面，可能會影響到網站嘅曝光率。但一嚟有啲問題我並唔係好諗到要點答，二嚟我係一個有啲注重私隱嘅人，我唔係咁鍾意向陌生人透露太多有關於我嘅私人資訊（或者我自己覺得係私人資訊啲嘢）。

另外本站目前仲未有自有網域。我唔知以後我會唔會將個網站搬去第個網域。到時要搬網域嘅話，要再去改返人地網站嘅連結，或者就會有少少麻煩。

唔知各位格友對呢樣有乜意見，歡迎透過電郵、私訊或留言（如果將來邊日本站整留言板嘅話）向我提出！

📌 2026/05/05 更新

Wiwi 後來出咗篇新文「NowNowNow 世界冠軍」，裏面提到「只要我們 BlogBlog 同樂會宇宙的大家一起用力進攻的話，應該有機會擠進前三名、甚至奪冠」。我睇完之後認為，BlogBlog 同樂會嘅參與者只有 100 人左右，而且唔係全部都係台灣人（我自己其實就係個外邦人，香港人），就算 BlogBlog 同樂會嘅所有參與者都有投稿 NowNowNow，台灣也入唔到前三。因此 Wiwi 呢個觀點有摻水之嫌，係有謬誤嘅，然後就即刻寫咗封電郵畀 Wiwi。

結果他回應話，「BlogBlog 同樂會宇宙並不限於已經有投稿的人呀，也包含這些網站的所有讀者、網站主的朋友們，以及那些以後會被拉進來的潛在成員」。咁樣算唔算係喺度摻水份？

呢個網站開咗兩個月喇，一直都冇自有網域¹，今日嚟討論一下揀域名嘅話題。

我當然知道 GitHub Pages 可以綁定自定義網域，我而家冇咁做純粹係懶得使錢去買個新網域啫。

.com 域名嘅偏好

「Wiwi 部落格宇宙」入面嘅好一啲部落格都對 .com 域名有強烈偏好。

在網路時代，.com 被佔走，就像名字被佔走一樣。

——支共喉舌 Alex Hsu《工程师爸爸如何帮小孩取英文名字》

• JN 有兩篇文（1、2）提到網域問題，佢自己就係用緊 .com 域名。
• Wiwi 為「推坑」主題所投稿嘅其中一篇文，就提到「半夜較鬧鐘爬起身搶 .com 域名」呢回事。
• 支共喉舌 Alex Hsu 提到佢使咗 USD $1700 買咗而家個 .com 域名。佢喺另一篇文表達咗對 [真名].com 域名嘅強烈偏好。
• 域名買咗落嚟，仲要養。Eddie Lv 提到，養一個 .blog 域名每年要燒 USD $2600，令佢果斷放棄，最終都係買咗 .com 域名。

頂級域名鄙視鏈

有啲人心目中有個「頂級域名鄙視鏈」，大概係咁樣：

.com > .net/.org > gTLD > ccTLD

按照定義，所有兩個字母嘅頂級域名都係「國家頂級網域」（ccTLD）。按照這條鄙視鏈，光鶯社羣位於呢條鄙視鏈嘅底部。

就喺唔係好耐之前，7-zip 就被爆出.com 域名遭到搶註做釣魚網站嘅事件，凸顯咗知名度高嘅服務註冊 .com 域名嘅重要性。

另外如果你要諗住自架郵件伺服器嘅話，實際上電子郵件服務喺好多年前就已經被大量嘅 spam mail 玩成咗信任死鎖，自架郵件服務好難出信㗎。據說 .com 域名發出嘅郵件送達率會高啲，而推出時代近啲嘅 .win、.xyz 之類嘅域名，由於容易被人拎嚟做奇怪嘅嘢，比較容易被其他網站不信任。

我嘅域名規劃

養一個域名係件好燒錢嘅事，齋為一個部落格買一個域名並唔划算。就算邊日呢個網站開始有自有網域，我應該都會將個部落格擺去 b.example.com 呢個樣嘅 subdomain 度。事實上我心入面已經有一個比較詳盡嘅 subdomain 規劃清單：

• a/ai: 自架私人 AI 伺服器（如果邊日有嘅話）
• b: 部落格
• f: 論壇、留言板
• g: GitHub Pages／自架 Gitea？（如果邊日有嘅話）
• i: 圖床
• m/mc: Minecraft 伺服器
• ms?: 自架 Mastodon？（如果邊日有嘅話）
• s/t?: 短網址
• sx: 自架 searx（如果邊日有嘅話）
• v: 自架 PeerTube（如果邊日有嘅話）

域名選擇

問題來喇，我應該揀點樣嘅域名呢？

有啲人鍾意用真名嚟做域名。支共喉舌 Alex Hsu 就提過佢鍾意咁嘅域名²。我嘅話會考量到身份隔離嘅問題，就算我買咗用我真名構成嘅域名，我都唔會拎嚟畀我寫呢一個部落格嘅身份用。

另外，.io 嘅前景唔係好明朗，喺佢嘅未來走向確定之前，最好唔好買新嘅 .io 域名。

暗網域名

光鶯社羣有啲會用暗網嘅成員，當中有為成個組織配置暗網域名嘅成員。

• Tor、I2P 有現成嘅挖域名工具。甚至有人挖咗一堆 yjspi 開頭的 .onion 域名。
• Yggdrasil 本質上就係一層虛擬嘅 IPv6 地址，可以隨便綁定任意域名，我整個 y/ygg 嘅 subdomain 就得。
• Lokinet 可能冇現成嘅挖域名工具。

最近睇咗支共喉舌 Alex Hsu 嘅《无菜单部落格：做一个任性一点的个人网站》，講吓我一啲個人睇法。

亮色主題同暗色主題

本站而家係同時提供亮色主題同暗色主題，並且預設係自動偵測模式，但亦都容許用戶㩒選單度嘅掣去轉模式。

但係如果點都要揀一個呢？Alex 提到最近佢抆走咗成個亮色模式，我就覺得還好。相反由於我自己係個會深夜匿埋喺間黑鼆鼆嘅房度睇手機嘅人，所以就唔係咁鍾意廢文小天地同 Wen 嘅常時亮瞎狗眼模式（嗰種亮瞎狗眼模式比較適合喺電子墨水屏或紙本閱讀，或者我應該投資一個電子書閱讀器？）。上古時期冇 CSS 嘅時代，預設佈局都係亮色模式，造成咗而家嘅瀏覽器喺冇用 CSS 指定顏色嗰陣，預設都係亮色模式。

繁簡轉換

我有考慮過要唔要為呢個網站整個「單向繁簡轉換」，不過我懶，目前仲未實現。

至於「雙向繁簡轉換」基本上係個毒瘤，簡體一對多嘅情形成日會導致雙向繁簡轉換過度轉換嘅情形。

本人嘅出生地同成長地都喺香港。相較於臺灣而言，由於文化接觸同人口結構變化嘅因素，香港人喺日常生活中有住更多接觸到簡體字嘅機會。香港人對於簡體字嘅閱讀能力普遍好過臺灣人，少啲有「簡體字閱讀障礙」，「睇簡體字嗰陣速度慢好多」嘅情形。我自己睇繁體字同簡體字嘅流暢度，喺大多數時候嘅分別其實唔係好大。

橫排同直排

喺「Wiwi 部落格宇宙」當中，有一個打棟寫嘅部落格，嗰個就係「我」（e89295）。

臺灣同日本嘅國文課本有一個共同特色，就係都係打棟寫嘅。相比之下，大陸同香港嘅國文課本就都係打橫寫嘅（不過香港打棟寫嘅中文書倒係唔少）。

以前嘅電子設備，由於都係由缺乏縱排書寫習慣嘅洋人主宰，對打棟寫嘅文字嘅支援往往唔係好好。不過而家嘅電子設備對於縱排文字嘅支援度其實已經改善咗不少。

話雖如此，好似「我的部落格」之類嘅縱排網頁，喺用移動設備睇嗰陣，打橫擺體驗可能會更好喔～

表格排版

有好多研究顯示，限制內文嘅排版寬度有助於提升閱讀體驗（至少針對橫排文字而言）。我有唔少語言學相關文章，入面會擠表格。當表格欄目較多嗰陣，不時就會出現寬度溢出嘅情形，望落唔係咁靚。或者我要睇吓有冇更好嘅表格排版機制，或是其實我應該擠圖？

📌 想即刻體驗？

• 源碼喺度！
• 配套 CSS

喺研究 Hugo 嘅過程當中整出嚟嘅一個實用小玩具。

用法

Markdown 語法：

{{< ruby 文字 注音 >}}

渲染效果： 文字（注音）

⏳ 近排嘅狀態

• 🏡 一直住喺香港。
• 💼 都係個無業遊民。我喺「理想的日常」入面有簡單提過下。

❓ 近排做乜嘢

• ⛪️ 有維持最近一年以嚟返教會嘅習慣，但都係冇信嘅打算。

⚠️ Notice

呢篇文章暫時仲未粵語化，暫時拎住書面語版本頂住檔先。我遲啲有時間會更新返粵語版本！

本文使用的拼音系統為粵拼。

聲母

標準粵語有 20 個聲母音位。雖然說好些人已經把 /n/ 和 /l/, /ŋ/ 和 /ʔ/ ~ ∅ 之類的聲母對混同。

兩套齒擦音似乎是同位異音（allophones）或自由變體（free variation）。有些人在非圓唇元音前面唸作 /ts/, /tsʰ/, /s/，在圓唇元音前面唸作 /tʃ/, /tʃʰ/, /ʃ/，也有人在所有情形下統統唸作齒音。不過一些語言學文獻提到這兩套發音在 1950 年代以前的粵語中是兩套不同的聲母。詳見拙文「淺談數個漢語方言現象」。

韻母

一般認為標準粵語有 8 個主元音音位，儘管實際音值大約有 11 種。以星號 * 標註的為罕用發音。

較老的粵語有 /om/ 和 /op/，不過今天一般已經併入了 /ɐm/ 和 /ɐp/。

/aː/, /ɐ/, /ɛː/ 和 /iː/ 是非圓唇元音，而 /ɔː/, /œː/, /uː/ and /yː/ 是圓唇元音。元音的圓唇性質有可能會影響到 /ts/, /tsʰ/, /s/ 或 /tʃ/, /tʃʰ/, /ʃ/ 的實際音值。

與大部份的歐洲語言不同，當塞音（i.e. -p, -t 和 -k）作為韻尾的時候，都是不除阻的。

聲調

「短陰入、長陰入」也分別叫做「高陰入、低陰入」。

💡 冷知識

粵語是少數保留陽上調的漢語變體。大部份的現代漢語變體一般把陽上併入了陽去或者陰上調。

今天睇咗支共喉舌 Alex Hsu 嘅呢篇《你的RSS文章寿命可能只有别人的一半》，即刻 check 下自己網站嘅 RSS 資訊，發現 RSS 輸出入面嘅 <pubDate> 係拎 date 而唔係我喺 frontmatter 度指定嘅 lastmod 屬性。後者先至係我想喺 RSS show 出嚟嘅發佈時間。

我而家嘅發佈流程

呢度而家係用 Hugo 同 GitHub Pages 起出嚟嘅。響我寫一篇新文章嘅時候，會喺臨 save file 嗰陣𥄫下而家個時間，然後手動填個時間上去 frontmatter 嘅 date，然後盡快推上 GitHub。響我更新舊文嘅時候，我就唔郁 date 而係郁 lastmod。殊不知原來咁嘅更新方法，反而係伏咗我自己。

開工

要改動 RSS 入面嘅發佈時間，我哋可以從 layouts/rss.xml （至少我而家用緊呢個主題係呢個 file）呢個 file 入手。呢個 file 裏面有行係咁樣：

<pubDate>{{ .PublishDate.Format "Mon, 02 Jan 2006 15:04:05 -0700" | safeHTML }}</pubDate>

其中 .PublishDate 代表 frontmatter 嘅 date 屬性，而 lastmod 屬性就係 .Lastmod。換咗呢個值之後應該就搞掂喇。

我唔知以我而家嘅發佈流程嚟睇，可唔可以做到自動填同改發佈日期，如果得嘅話以後有空也許會試着做做看。

📌 2026/04/24 更新

我搵到個可以從 Git 拎日子嘅 Hugo 選項。唔確定呢樣對我係咪有用。

好啦，呢篇係篇跟風文。呢篇文用嘅問題集嘅原始版本出自 Kev Quirk，最近繁體中文部落格嘅不完全跟風名單有：廢文小天地、黃宏勝、JN、侃侃而隨想極短文、Ikuka、Shuyu、Wiwi、Alex Hsu、黃碩人。

問題清單

1. 你當初點解開始寫部落格？
2. 你用咩平台去管理你嘅部落格？點解揀佢？
3. 你之前有冇喺其他平台度寫過寫過部落格文章嗎？
4. 你點樣寫文？例如，用本地編輯工具，定係喺部落格嘅後台／控制面板度寫？
5. 你咩時候最有寫作靈感？
6. 你會喺寫完後即刻發佈，定係會存成草稿醞釀下先？
7. 你部落格上最鍾意嘅文章係邊一篇？
8. 你對部落格有乜嘢未來計劃？例如重新設計、搬到另一個平台，或是加入新功能？

我嘅答案

你當初點解開始寫部落格？

主要係整嚟擠筆記順便嚟黐下 BlogBlog 同樂會？我目前仲未將我所有嘅筆記都整理好。

你用咩平台去管理你嘅部落格？點解揀佢？

目前唯一用緊嘅「平台」係 GitHub Pages，網站界面本身用 Hugo 生成。或者唔知幾時諗住起留言板嗰陣要考慮租個 VPS。或者唔知幾時諗住將成個網站搬去第個平台度 host。

你之前有冇喺其他平台度寫過部落格文章？

好耐之前有稍微掂過下 Blogger，但當時唔似得而家咁有咁多閒情寫 blog，好快就荒廢咗。

你點樣寫文？

都係用本地文字編輯器直接改 markdown 檔案喔。

呢個部落格網站有英語同粵語版本，但由於我目前極少喺不諳漢語嘅圈子宣傳呢個網站，所以本站嘅英語內容大部份都是用住機器翻譯工具粗翻一次先，以後有時間先再嚟慢慢校對喇。

你咩時候最有寫作靈感？

好難講，唔存在固定時間。

你會喺寫完後即刻發佈，定係會存成草稿醞釀下先？

兩樣都有。有時候諗到靈感之後就即刻成篇寫好嘅就會即刻 po 出嚟。有時候淨係諗到一小部份嘅話或者就會存成草稿，亦都有可能會 po 出嚟先遲啲再慢慢執。BlogBlog 同樂會之類比較需要灌注心力嘅文章都係分段完成嘅。我覺得短期內我應都唔會有維持到日更嘅毅力，所以亦都無謂囤稿喇。

你部落格上最鍾意嘅文章係邊一篇？

本站文章數量暫時唔係好多，好難講。

你對部落格有乜嘢未來計劃？

• 等到網站人流夠多嗰陣，或者會考慮起個留言板？
• 或者會考慮將成個網站搬去自有網域？

據說喺國外（尤其係西方世界，特別是舊啲嘅𨋢更有可能這樣），𨋢門唔一定會提供「閂門」嘅掣。

據說有啲地方，𨋢門的「閂門」掣只係個安慰劑。

而喺香港，以我所見大部份𨋢門嘅「閂門」掣是真係有用嘅。

喺工程角度嚟講，整一個「閂門」掣會令到整部𨋢嘅設計複雜化，所以有時候唔整好過整。

從文化角度嚟講，或者國外嘅文化根本就唔 care 要道𨋢門快點閂埋嘅命題，時候到喇𨋢門就自然會自己閂埋，急你老母！

我有一部經常使用的𨋢，佢粒閂門掣就疑似係個安慰劑。人一行入去㩒咗樓層門就開始自己閂埋喇。

💡 BlogBlog 同樂會！

呢篇係我嘅「BlogBlog 同樂會 - 2026 年 4 月」嘅投稿文章。今個月嘅主題係「生產力」，由 Wen 主持。如果你有自己嘅部落格，歡迎一起嚟參加！

非完全信息博弈：囚徒困境同納什均衡

呢個世界上好多嘅博弈都係非完全信息嘅，即係參與博弈嘅各方，有住啲其他參與方唔知嘅隱藏資訊。

舉個例子，警局同兩名疑犯做認罪協商，如果兩名疑犯都唔認罪（共同合作），則二人同樣判監半年；如果其中一名疑犯認罪（背叛）而另一名疑犯保持沉默（合作）嘅話，認罪嗰個將即時獲釋，沉默嗰個將判監十年；如果兩名疑犯一齊認罪（互相背叛），咁兩個人就同樣判監五年。而兩名疑犯之間並唔可以互相交流。

呢個就叫做囚徒困境（Prisoner’s dilemma）。你會發現，喺雙方都互相信唔到對方嘅情形下，雙方喺只考慮自身利益時嘅最優策略，居然都係揀背叛！而相互背叛又唔會為雙方帶嚟更好嘅整體利益（只會將單獨考慮每名疑犯自身嘅利益最大化），形成「寧為玉碎，不作瓦全」嘅雙輸局面。當任何一方都冇誘因去單方面改變佢嘅選擇時，納什均衡（Nash equilibrium）就形成咗。

可以話好多非完全信息博弈所導致嘅後果，實際上係降低緊全世界嘅整體生產力㗎。¹

（如果雙方共同合作嘅收益大過互相背叛嘅虧損，咁就唔叫囚徒困境而係叫獵鹿博弈。喺獵鹿博弈入面，「共同合作」同「互相背叛」都係納什均衡。）

諸神黃昏嘅雙輸局面

面對百年未有之大便局，冇一樣現成產品喺各方面都係完美嘅，你只可以喺各種唔同嘅大便入面揀個最冇咁難聞嘅，然後試下將佢整做你接受到嘅樣。

廣告兩難

將囚徒困境套用喺商業層面，就可以解釋成：每間公司都有兩個選擇，一係將更多嘅資源投放落廣告度以求削弱或者打倒競爭對手（互相背叛）；二係同競爭對手互相達成協議，減少浪費喺廣告嘅資源（共同合作）。喺現實嘅商業環境入面，互相背叛極其常見，結果大量嘅資源同網絡流量就被白白浪費咗喺廣告度，而絕大多數嘅消費者其實根本眼尾都唔會睄下。

喺呢場博弈之中，最終受害嘅，竟然係終端用戶。各種過於猖狂嘅廣告迫使終端用戶紛紛開起咗廣告攔截器。隨着 Google 對廣告攔截器嘅宣戰，一場新嘅兩難博弈正悄然打響。某啲（可能有佢存在價值嘅）網站同服務不得不依賴廣告維生如果唔係會餓死，但廣告服務又依賴各種侵犯用戶私隱嘅追蹤器，將注重私隱嘅用戶羣嚇走，但用戶嘅流失又變相威脅到平台嘅財政，形成兩難局面。

瀏覽器之戰

先嚟睇睇各位用緊嘅瀏覽器啦。常見嘅瀏覽器有乜優缺點？

• Google Chrome 被人話係間諜軟件同廣告軟件唔係第一天喇。
• Microsoft Edge 界面相對較為煩人，而且亦都被人話係間諜軟件同廣告軟件。
• Firefox 嘅背景望落自由啲，界面比較乾淨，但因為市佔率因素導致某啲網頁可能會對 Firefox 唔係咁友善，而且 Pront 同埋（曾經嘅²）Wiwi 都指責佢話係間諜軟件，而且聽講 Firefox Android 版唔係咁好用。
• Brave 被光鶯社羣共同創辦人之一嘅 Lumière Élevé 認為佢應該得到同「威脅用戶安全」嘅瀏覽器同樣嘅待遇（喺光鶯社羣嘅服務之中屏蔽），並稱 Brave「冇人會對呢種畀錢加密貨幣圈嘅嘢落淚，更何況仲係用緊 Google 控制嘅 Chromium 內核³」、「槍斃咗唔心疼⁴」。
• Safari 係蘋果平台專屬，用咗啲藞苴（laa5 zaa2） 招去強行保住佢嘅市佔率。
• LibreWolf 比較適合私隱愛好者，但係要加載需要硬體加速嘅頁面嘅話就咪使旨意喇。
• Cromite 應該係喺 Chromium 系瀏覽器入面最注重私隱㗎喇，亦都冇來自加密貨幣圈嘅大便，但它都仲係有一啲來自 Chromium 嘅原罪⁵。

由上所見，冇一樣現成產品喺各方面都係完美嘅，你只可以喺各種唔同嘅大便入面揀個最冇咁難聞嘅，然後試下將佢整做你接受到嘅樣。

即時通訊軟件嘅諸神黃昏

即時通訊軟件都係一團大便，你只能喺各種不同嘅大便入面取捨。

• Discord 商業味太濃，而且仲喺度為年齡驗證單嘢炎上緊噃。
• Telegram 家陣收費功能越搞越多喇，「永遠免費」已成絕響。而且 Telegram 嘅聲音傳輸質量渣過 Discord。
• Matrix 嘅穩定性（特別係基於 Synapse 嘅 homeserver）似乎仲未夠好。
• Stoat 目標係替代 Discord ，雖然打住「反對歧視」嘅標語，但似乎對來自一啲國家嘅人有地域歧視，一竹篙打一船人。
• Fluxer 都係 Discord 嘅一個替代品，但佢將 Discord 嘅課金手段都學得別無二致，甚至有過之而無不及。
• SimpleX 用到而且保密性仲係頂尖㗎，但跨裝置登錄就唔使諗喇。
• Signal 雖然加密本身冇乜挑剔，但除咗加密之外嘅地方問題就多喇，除咗私密訊息嘅通知推送包含消息明文之外，背後嘅團隊亦對反審查毫無概念，至今仲喺度向受審查地區嘅用戶推薦佢哋有嚴重問題嘅 TLS 代理，將用戶置身喺危險之中。
• Whatsapp 會將你嘅資料源源不斷咁餵畀 Meta，商業味太濃。

用愛發電

能夠單靠參與自由軟件專案嚟維持生活當然係好理想，但現實係能夠單單靠開發自由軟件嚟維持生計的人並唔係咁多。

現實當中 FOSS 往往靠以下方式嚟維生：

• 售賣對應嘅周邊服務（例如 Caddy、cURL、SQLite3 賣技術支援、以及某個吃相糟糕嘅打譜軟件）
• 將軟件雙授權，開源軟件可以以開放原始碼協定免費使用依賴，閉源軟件必須購買付費授權（如 Qt、JUCE）
• 獲取專項撥款（如從 NLnet、FOSS.United 等獲取撥款，例如 Rethink）
• 售賣預構建二進位檔案（如 Ardour）
• 獲取政府合同（Tuwunnel 從瑞士政府獲取資助合同）或公司合同（Valve 以公司合同資助一啲 KDE 開發者）
• 收課金（就係純粹嘅用愛發電，需要足夠有人氣）
• 捐授權協定罅，直接賣授權（RHEL）

結果就係自由軟件往往淪為唔會被投放充足勞動力嘅副業，造成家陣自由軟件市場質素參差、良莠不齊。

一潭死水嘅自由軟件市場

「自由軟件連嘢都做唔到，咁愛佢把鬼吖？」——佚名

博弈嘅後果係，好多必要嘅軟件同服務，往往都達唔到（所有條件都）理想嘅狀況，哪怕現成嘅選擇其實唔少。

Wiwi 就曾經有列出過一個真·宅男指南。我覺得佢裏面嘅唔少睇法（至少喺 2026 年當下）實在係有啲太過激進，一啲項目實際上並唔唔係好現實，同燒錢冇乜分別。預算不足嘅情況下甚至只會構成對生產力嘅拖累。

• 你以為全世界所有人都能力自架離線 AI？我嘅話樽頸唔喺技術力，而係喺某啲天龍人意想不到的嘅方面，請見下文。
• 「對廣告嘅態度」係個兩難，上面已經講咗喇。
• 避免訂閱服務（或曰「租用」）聽落好理想好崇高咁，但喺當今呢個諸神黃昏嘅時代，用得嘅買斷制軟件又有幾多？
• 個人使用當然可以避免專有格式，但當你為咗維持生計而不得不出嚟做嘢嘅時候，呢啲專有格式，你以為你完全避到？
• 當自由軟件市場仲係一潭死水嘅狀況下，市場需求自然會更加傾向 Windows 同 macOS 呢啲主流作業系統，開發 Linux 軟件喺商業角度上並不討好。Wine 唔係萬能㗎。
• 自架郵件伺服器你估咁易？實際上喺好多年前就已經被大量嘅 spam mail 玩成咗信任死鎖，自架郵件服務好難出信㗎。
• 即時通訊軟件是諸神黃昏，上面講咗。

不過我而家仲係經濟拮据。你而家睇到嘅呢個部落格，就連自有網域都仲未有⁶，更何談各種極其燒錢的自架服務了。

人工智能對生產力嘅影響

喺人工智能可以快速搞掂人類以往需要花更多時間同心力先搞得掂嘅嘢嘅背景下，可以話人工智能（喺某些領域嘅）生產力已經超越咗人類。喺呢啲被 AI 主導嘅領域當中，只有最頂尖嘅人類先存活到，生產力追唔上 AI 的人就會被社會淘汰。

• 細個嗰陣有啲憧憬做軟件工程師，但係喺而家 vibe coding 大行其道嘅時代下，單純做個軟件工程師喺商業角度上已經唔係咁討好喇。
• 細個嗰陣有啲憧憬做同人繪師，結果 AI 而家都畫得快過人手兼且品質唔錯喇。
• 靜態嘅翻譯行為，就算冇咁準確都被「夠用就得」踢咗出嚟，只剩低更傷腦筋嘅即時傳譯仲有需求，或者可以考慮轉行做「低資源語言」（如各種漢語「方言」）嘅翻譯。

不過行人工智能好食電，喺當今全球能源危機嘅形勢下，人工智能嘅發展趨勢會唔會被迫放緩？

點樣運用人工智能提升生產力？

喺人工智能時代下，我哋應該點樣有效運用人工智能嚟提升自身嘅生產力，以免被社會淘汰？

• 我哋唔應該完全抗拒 vibe coding，但亦都唔應該完全依賴佢，唔應該對 AI 生成嘅代碼囫圇吞棗。點知邊日會出現智能叛變？
• 做藝術工作者嘅一係諗辦法變成最頂尖嘅人類，一係可以用 AI 打草稿先再諗辦法執。
• 試下強化人與人的連結啦，有啲行業會比較強調同人類之間嘅交流，應該會冇咁易被 AI 取代。