⚠️ Notice

呢篇文章暫時仲未粵語化，暫時拎住書面語版本頂住檔先。我遲啲有時間會更新返粵語版本！

本文使用的拼音系統為粵拼。

聲母

標準粵語有 20 個聲母音位。雖然說好些人已經把 /n/ 和 /l/, /ŋ/ 和 /ʔ/ ~ ∅ 之類的聲母對混同。

兩套齒擦音似乎是同位異音（allophones）或自由變體（free variation）。有些人在非圓唇元音前面唸作 /ts/, /tsʰ/, /s/，在圓唇元音前面唸作 /tʃ/, /tʃʰ/, /ʃ/，也有人在所有情形下統統唸作齒音。不過一些語言學文獻提到這兩套發音在 1950 年代以前的粵語中是兩套不同的聲母。詳見拙文「淺談數個漢語方言現象」。

韻母

一般認為標準粵語有 8 個主元音音位，儘管實際音值大約有 11 種。以星號 * 標註的為罕用發音。

較老的粵語有 /om/ 和 /op/，不過今天一般已經併入了 /ɐm/ 和 /ɐp/。

/aː/, /ɐ/, /ɛː/ 和 /iː/ 是非圓唇元音，而 /ɔː/, /œː/, /uː/ and /yː/ 是圓唇元音。元音的圓唇性質有可能會影響到 /ts/, /tsʰ/, /s/ 或 /tʃ/, /tʃʰ/, /ʃ/ 的實際音值。

與大部份的歐洲語言不同，當塞音（i.e. -p, -t 和 -k）作為韻尾的時候，都是不除阻的。

聲調

「短陰入、長陰入」也分別叫做「高陰入、低陰入」。

💡 冷知識

粵語是少數保留陽上調的漢語變體。大部份的現代漢語變體一般把陽上併入了陽去或者陰上調。

今天睇咗 Alex Hsu 嘅呢篇《你的RSS文章壽命可能只有別人的一半》，即刻 check 下自己網站嘅 RSS 資訊，發現 RSS 輸出入面嘅 <pubDate> 係拎 date 而唔係我喺 frontmatter 度指定嘅 lastmod 屬性。後者先至係我想喺 RSS show 出嚟嘅發佈時間。

我而家嘅發佈流程

呢度而家係用 Hugo 同 GitHub Pages 起出嚟嘅。響我寫一篇新文章嘅時候，會喺臨 save file 嗰陣𥄫下而家個時間，然後手動填個時間上去 frontmatter 嘅 date，然後盡快推上 GitHub。響我更新舊文嘅時候，我就唔郁 date 而係郁 lastmod。殊不知原來咁嘅更新方法，反而係伏咗我自己。

開工

要改動 RSS 入面嘅發佈時間，我哋可以從 layouts/rss.xml （至少我而家用緊呢個主題係呢個 file）呢個 file 入手。呢個 file 裏面有行係咁樣：

<pubDate>{{ .PublishDate.Format "Mon, 02 Jan 2006 15:04:05 -0700" | safeHTML }}</pubDate>

其中 .PublishDate 代表 frontmatter 嘅 date 屬性，而 lastmod 屬性就係 .Lastmod。換咗呢個值之後應該就搞掂喇。

我唔知以我而家嘅發佈流程嚟睇，可唔可以做到自動填同改發佈日期，如果得嘅話以後有空也許會試着做做看。

📌 2026/04/24 更新

我搵到個可以從 Git 拎日子嘅 Hugo 選項。唔確定呢樣對我係咪有用。

搞咗一輪終於（某程度上）整好咗個自建部落格，但有啲功能嘅實作我仲喺度奮鬥緊。

因為我對個 framework 暫時未係太熟，呢個網站可能會有好多奇奇怪怪嘅 bug。有任何技術建議歡迎向直接我提出，或者直接喺個 GitHub repo 度出個 PR 都得！感謝各位讀者的支持！

📌 2026/03/14 更新

喺研究一啲設定之後，大部份肉眼可見嘅 UI 問題都解決咗！雖然花咗多過一開始預期嘅時間去處理。不過就唔知點解「閱讀時間」一直 show 唔到出嚟。

📌 2026/04/13 更新

UI 大翻新。上述「閱讀時間」 show 唔到嘅問題解決咗。

📌 2026/04/23 更新

更換全站配色。

好啦，呢篇係篇跟風文。呢篇文用嘅問題集嘅原始版本出自 Kev Quirk，最近繁體中文部落格嘅不完全跟風名單有：廢文小天地、黃宏勝、JN、侃侃而隨想極短文、Ikuka、Shuyu、Wiwi、Alex Hsu、黃碩人。

問題清單

1. 你當初點解開始寫部落格？
2. 你用咩平台去管理你嘅部落格？點解揀佢？
3. 你之前有冇喺其他平台度寫過寫過部落格文章嗎？
4. 你點樣寫文？例如，用本地編輯工具，定係喺部落格嘅後台／控制面板度寫？
5. 你咩時候最有寫作靈感？
6. 你會喺寫完後即刻發佈，定係會存成草稿醞釀下先？
7. 你部落格上最鍾意嘅文章係邊一篇？
8. 你對部落格有乜嘢未來計劃？例如重新設計、搬到另一個平台，或是加入新功能？

我嘅答案

你當初點解開始寫部落格？

主要係整嚟擠筆記順便嚟黐下 BlogBlog 同樂會？我目前仲未將我所有嘅筆記都整理好。

你用咩平台去管理你嘅部落格？點解揀佢？

目前唯一用緊嘅「平台」係 GitHub Pages，網站界面本身用 Hugo 生成。或者唔知幾時諗住起留言板嗰陣要考慮租個 VPS。或者唔知幾時諗住將成個網站搬去第個平台度 host。

你之前有冇喺其他平台度寫過部落格文章？

好耐之前有稍微掂過下 Blogger，但當時唔似得而家咁有咁多閒情寫 blog，好快就荒廢咗。

你點樣寫文？

都係用本地文字編輯器直接改 markdown 檔案喔。

呢個部落格網站有英語同粵語版本，但由於我目前極少喺不諳漢語嘅圈子宣傳呢個網站，所以本站嘅英語內容大部份都是用住機器翻譯工具粗翻一次先，以後有時間先再嚟慢慢校對喇。

你咩時候最有寫作靈感？

好難講，唔存在固定時間。

你會喺寫完後即刻發佈，定係會存成草稿醞釀下先？

兩樣都有。有時候諗到靈感之後就即刻成篇寫好嘅就會即刻 po 出嚟。有時候淨係諗到一小部份嘅話或者就會存成草稿，亦都有可能會 po 出嚟先遲啲再慢慢執。BlogBlog 同樂會之類比較需要灌注心力嘅文章都係分段完成嘅。我覺得短期內我應都唔會有維持到日更嘅毅力，所以亦都無謂囤稿喇。

你部落格上最鍾意嘅文章係邊一篇？

本站文章數量暫時唔係好多，好難講。

你對部落格有乜嘢未來計劃？

• 等到網站人流夠多嗰陣，或者會考慮起個留言板？
• 或者會考慮將成個網站搬去自有網域？

據說喺國外（尤其係西方世界，特別是舊啲嘅𨋢更有可能這樣），𨋢門唔一定會提供「閂門」嘅掣。

據說有啲地方，𨋢門的「閂門」掣只係個安慰劑。

而喺香港，以我所見大部份𨋢門嘅「閂門」掣是真係有用嘅。

喺工程角度嚟講，整一個「閂門」掣會令到整部𨋢嘅設計複雜化，所以有時候唔整好過整。

從文化角度嚟講，或者國外嘅文化根本就唔 care 要道𨋢門快點閂埋嘅命題，時候到喇𨋢門就自然會自己閂埋，急你老母！

我有一部經常使用的𨋢，佢粒閂門掣就疑似係個安慰劑。人一行入去㩒咗樓層門就開始自己閂埋喇。

💡 BlogBlog 同樂會！

呢篇係我嘅「BlogBlog 同樂會 - 2026 年 4 月」嘅投稿文章。今個月嘅主題係「生產力」，由 Wen 主持。如果你有自己嘅部落格，歡迎一起嚟參加！

非完全信息博弈：囚徒困境同納什均衡

呢個世界上好多嘅博弈都係非完全信息嘅，即係參與博弈嘅各方，有住啲其他參與方唔知嘅隱藏資訊。

舉個例子，警局同兩名疑犯做認罪協商，如果兩名疑犯都唔認罪（共同合作），則二人同樣判監半年；如果其中一名疑犯認罪（背叛）而另一名疑犯保持沉默（合作）嘅話，認罪嗰個將即時獲釋，沉默嗰個將判監十年；如果兩名疑犯一齊認罪（互相背叛），咁兩個人就同樣判監五年。而兩名疑犯之間並唔可以互相交流。

呢個就叫做囚徒困境（Prisoner’s dilemma）。你會發現，喺雙方都互相信唔到對方嘅情形下，雙方喺只考慮自身利益時嘅最優策略，居然都係揀背叛！而相互背叛又唔會為雙方帶嚟更好嘅整體利益（只會將單獨考慮每名疑犯自身嘅利益最大化），形成「寧為玉碎，不作瓦全」嘅雙輸局面。當任何一方都冇誘因去單方面改變佢嘅選擇時，納什均衡（Nash equilibrium）就形成咗。

可以話好多非完全信息博弈所導致嘅後果，實際上係降低緊全世界嘅整體生產力㗎。¹

（如果雙方共同合作嘅收益大過互相背叛嘅虧損，咁就唔叫囚徒困境而係叫獵鹿博弈。喺獵鹿博弈入面，「共同合作」同「互相背叛」都係納什均衡。）

諸神黃昏嘅雙輸局面

面對百年未有之大便局，冇一樣現成產品喺各方面都係完美嘅，你只可以喺各種唔同嘅大便入面揀個最冇咁難聞嘅，然後試下將佢整做你接受到嘅樣。

廣告兩難

將囚徒困境套用喺商業層面，就可以解釋成：每間公司都有兩個選擇，一係將更多嘅資源投放落廣告度以求削弱或者打倒競爭對手（互相背叛）；二係同競爭對手互相達成協議，減少浪費喺廣告嘅資源（共同合作）。喺現實嘅商業環境入面，互相背叛極其常見，結果大量嘅資源同網絡流量就被白白浪費咗喺廣告度，而絕大多數嘅消費者其實根本眼尾都唔會睄下。

喺呢場博弈之中，最終受害嘅，竟然係終端用戶。各種過於猖狂嘅廣告迫使終端用戶紛紛開起咗廣告攔截器。隨着 Google 對廣告攔截器嘅宣戰，一場新嘅兩難博弈正悄然打響。某啲（可能有佢存在價值嘅）網站同服務不得不依賴廣告維生如果唔係會餓死，但廣告服務又依賴各種侵犯用戶私隱嘅追蹤器，將注重私隱嘅用戶羣嚇走，但用戶嘅流失又變相威脅到平台嘅財政，形成兩難局面。

瀏覽器之戰

先嚟睇睇各位用緊嘅瀏覽器啦。常見嘅瀏覽器有乜優缺點？

• Google Chrome 被人話係間諜軟件同廣告軟件唔係第一天喇。
• Microsoft Edge 界面相對較為煩人，而且亦都被人話係間諜軟件同廣告軟件。
• Firefox 嘅背景望落自由啲，界面比較乾淨，但因為市佔率因素導致某啲網頁可能會對 Firefox 唔係咁友善，而且 Pront 同埋（曾經嘅²）Wiwi 都指責佢話係間諜軟件，而且聽講 Firefox Android 版唔係咁好用。
• Brave 被光鶯社羣共同創辦人之一嘅 Lumière Élevé 認為佢應該得到同「威脅用戶安全」嘅瀏覽器同樣嘅待遇（喺光鶯社羣嘅服務之中屏蔽），並稱 Brave「冇人會對呢種畀錢加密貨幣圈嘅嘢落淚，更何況仲係用緊 Google 控制嘅 Chromium 內核³」、「槍斃咗唔心疼⁴」。
• Safari 係蘋果平台專屬，用咗啲藞苴（laa5 zaa2） 招去強行保住佢嘅市佔率。
• LibreWolf 比較適合私隱愛好者，但係要加載需要硬體加速嘅頁面嘅話就咪使旨意喇。
• Cromite 應該係喺 Chromium 系瀏覽器入面最注重私隱㗎喇，亦都冇來自加密貨幣圈嘅大便，但它都仲係有一啲來自 Chromium 嘅原罪⁵。

由上所見，冇一樣現成產品喺各方面都係完美嘅，你只可以喺各種唔同嘅大便入面揀個最冇咁難聞嘅，然後試下將佢整做你接受到嘅樣。

即時通訊軟件嘅諸神黃昏

即時通訊軟件都係一團大便，你只能喺各種不同嘅大便入面取捨。

• Discord 商業味太濃，而且仲喺度為年齡驗證單嘢炎上緊噃。
• Telegram 家陣收費功能越搞越多喇，「永遠免費」已成絕響。而且 Telegram 嘅聲音傳輸質量渣過 Discord。
• Matrix 嘅穩定性（特別係基於 Synapse 嘅 homeserver）似乎仲未夠好。
• Stoat 目標係替代 Discord ，雖然打住「反對歧視」嘅標語，但似乎對來自一啲國家嘅人有地域歧視，一竹篙打一船人。
• Fluxer 都係 Discord 嘅一個替代品，但佢將 Discord 嘅課金手段都學得別無二致，甚至有過之而無不及。
• SimpleX 用到而且保密性仲係頂尖㗎，但跨裝置登錄就唔使諗喇。
• Signal 雖然加密本身冇乜挑剔，但除咗加密之外嘅地方問題就多喇，除咗私密訊息嘅通知推送包含消息明文之外，背後嘅團隊亦對反審查毫無概念，至今仲喺度向受審查地區嘅用戶推薦佢哋有嚴重問題嘅 TLS 代理，將用戶置身喺危險之中。
• Whatsapp 會將你嘅資料源源不斷咁餵畀 Meta，商業味太濃。

用愛發電

能夠單靠參與自由軟件專案嚟維持生活當然係好理想，但現實係能夠單單靠開發自由軟件嚟維持生計的人並唔係咁多。

現實當中 FOSS 往往靠以下方式嚟維生：

• 售賣對應嘅周邊服務（例如 Caddy、cURL、SQLite3 賣技術支援、以及某個吃相糟糕嘅打譜軟件）
• 將軟件雙授權，開源軟件可以以開放原始碼協定免費使用依賴，閉源軟件必須購買付費授權（如 Qt、JUCE）
• 獲取專項撥款（如從 NLnet、FOSS.United 等獲取撥款，例如 Rethink）
• 售賣預構建二進位檔案（如 Ardour）
• 獲取政府合同（Tuwunnel 從瑞士政府獲取資助合同）或公司合同（Valve 以公司合同資助一啲 KDE 開發者）
• 收課金（就係純粹嘅用愛發電，需要足夠有人氣）
• 捐授權協定罅，直接賣授權（RHEL）

結果就係自由軟件往往淪為唔會被投放充足勞動力嘅副業，造成家陣自由軟件市場質素參差、良莠不齊。

一潭死水嘅自由軟件市場

「自由軟件連嘢都做唔到，咁愛佢把鬼吖？」——佚名

博弈嘅後果係，好多必要嘅軟件同服務，往往都達唔到（所有條件都）理想嘅狀況，哪怕現成嘅選擇其實唔少。

Wiwi 就曾經有列出過一個真·宅男指南。我覺得佢裏面嘅唔少睇法（至少喺 2026 年當下）實在係有啲太過激進，一啲項目實際上並唔唔係好現實，同燒錢冇乜分別。預算不足嘅情況下甚至只會構成對生產力嘅拖累。

• 你以為全世界所有人都能力自架離線 AI？我嘅話樽頸唔喺技術力，而係喺某啲天龍人意想不到的嘅方面，請見下文。
• 「對廣告嘅態度」係個兩難，上面已經講咗喇。
• 避免訂閱服務（或曰「租用」）聽落好理想好崇高咁，但喺當今呢個諸神黃昏嘅時代，用得嘅買斷制軟件又有幾多？
• 個人使用當然可以避免專有格式，但當你為咗維持生計而不得不出嚟做嘢嘅時候，呢啲專有格式，你以為你完全避到？
• 當自由軟件市場仲係一潭死水嘅狀況下，市場需求自然會更加傾向 Windows 同 macOS 呢啲主流作業系統，開發 Linux 軟件喺商業角度上並不討好。Wine 唔係萬能㗎。
• 自架郵件伺服器你估咁易？實際上喺好多年前就已經被大量嘅 spam mail 玩成咗信任死鎖，自架郵件服務好難出信㗎。
• 即時通訊軟件是諸神黃昏，上面講咗。

不過我而家仲係經濟拮据。你而家睇到嘅呢個部落格，就連自有網域都仲未有⁶，更何談各種極其燒錢的自架服務了。

人工智能對生產力嘅影響

喺人工智能可以快速搞掂人類以往需要花更多時間同心力先搞得掂嘅嘢嘅背景下，可以話人工智能（喺某些領域嘅）生產力已經超越咗人類。喺呢啲被 AI 主導嘅領域當中，只有最頂尖嘅人類先存活到，生產力追唔上 AI 的人就會被社會淘汰。

• 細個嗰陣有啲憧憬做軟件工程師，但係喺而家 vibe coding 大行其道嘅時代下，單純做個軟件工程師喺商業角度上已經唔係咁討好喇。
• 細個嗰陣有啲憧憬做同人繪師，結果 AI 而家都畫得快過人手兼且品質唔錯喇。
• 靜態嘅翻譯行為，就算冇咁準確都被「夠用就得」踢咗出嚟，只剩低更傷腦筋嘅即時傳譯仲有需求，或者可以考慮轉行做「低資源語言」（如各種漢語「方言」）嘅翻譯。

不過行人工智能好食電，喺當今全球能源危機嘅形勢下，人工智能嘅發展趨勢會唔會被迫放緩？

點樣運用人工智能提升生產力？

喺人工智能時代下，我哋應該點樣有效運用人工智能嚟提升自身嘅生產力，以免被社會淘汰？

• 我哋唔應該完全抗拒 vibe coding，但亦都唔應該完全依賴佢，唔應該對 AI 生成嘅代碼囫圇吞棗。點知邊日會出現智能叛變？
• 做藝術工作者嘅一係諗辦法變成最頂尖嘅人類，一係可以用 AI 打草稿先再諗辦法執。
• 試下強化人與人的連結啦，有啲行業會比較強調同人類之間嘅交流，應該會冇咁易被 AI 取代。

📌 持續更新！

呢版係我諗到乜就寫乜嘅，一次可能淨係會寫一小部份，敬請留意本頁面嘅持續更新！

我知道好多輸入法嘅運作原理，但可以流利用到嘅並唔多，嘸蝦米係其中之一（但目前已非本人主力）。喺本人深入嘅研究之下，發現咗呢款輸入法（至少從佢嘅官方材料為出發點）嘅一啲唔完備嘅地方。

字根同鍵位

• 有好多實際上會用到嘅字根，喺官方字根表度未有列出。有啲民間資料會補返呢啲字根。
• 「戶」¹、「酉」、「臼」、「卜」等字官方文件聲稱佢哋嘅鍵位係從發音而嚟，但我冇搵到佢哋所依據嘅發音係乜。不過其他嘅音碼其實都冇好明確嘅取碼標準就係喇。
• 「喪」字都有「捨大根而不用」嘅嫌疑（「土口口𧘇」>「十口口𧘇」？），而且唔一定有符合大根原則嘅「容錯碼」。至於「囧」不攞「四」而攞做「囗儿ㄇ」或者「囗八ㄇ」，我哋可以定義「四」內部不可容物嚟解釋。

拆字

• 「主」字，我從來都唔明點解它拆做「丶王」而唔係「亠土」。（五筆同樣都拆做「丶王」，倉頡同行列就都係拆做「亠土」。嘸蝦米同五筆都有齊「丶亠土王」四個字根，點解唔係遵守大字根攞先嘅原則？）
• 嘸蝦米有「亼」字根，但「余舍」又唔用「亼」呢個大啲嘅字根而係拆做「人」。「余」有一個將首碼攞做「亼」嘅容錯碼，「舍」就冇將首碼攞做「亼」嘅容錯碼。更甚的是，官方並冇列出一個「余減走人」嘅字根，而係用「禾」嚟權充，而且補碼要攞做捺而唔係點（如果唔係會變做次選嘅容錯碼）。以上現象全部都可以類推到包含呢啲部件嘅字度。

兩碼字

• 「輿」有一個兩碼打法「CB」。呢個字一般習慣寫「𦥑（臼）」先再寫「車」，拆做「GCEB」，官方碼表亦將「GCEB」列為標準拆法，而「CGEB」為容錯碼。佢嘅兩碼打法「CB」列作「首尾碼」不妥。
• 「辭」字完整拆碼係「ETNL」，亦冇「辭」字嘅簡速字根，官方將兩碼打法「EJ」列作首尾碼疑有誤。
• 「瓜」字最後一筆似乎應該係捺而唔係點，官方碼表將兩碼打法「GA」列作標準取碼不妥。（但係「GN」又同「夾」撞咗，所以「GA」或者可以當硬性編碼留喺度。）
• • 其他帶有「瓜」部件嘅字如「孤狐」都有類似問題，補碼作 N 嘅容錯碼擠咗去次選位置。
• 「干」字按標準取碼，只可以拆做「GJ」，冇 V（附加 V 唔係標準取碼，只可以當係附加規則），官方將兩碼打法「GV」列作（標準取碼嘅）首尾碼不妥。
• 「艦」字嘅兩碼打法「GF」，官方列作「發音＋尾碼」，但佢個發音唔啱。
• 「或」字尾筆應該係右上角嘅點，而唔係橫，官方列作簡速字根嘅規則碼不妥。「武」字都有類似嘅問題，攞做 WE 而唔係 WA。以上字符都唔設末筆作點嘅「容錯碼」。
• • 實際上所有帶有「弋」或者「戈」部件嘅字都係咁。官方有提到咁樣嘅一條規則：「凡係帶有『弋』或者『戈』部件嘅字（包括呢兩個字本身），一律拎右上角嘅點先，然後攞『𫠠』或者『𭠍』，最後先至拎位於呢個部件左下方嘅部份。」但考慮到補碼取用嘅模糊性，或者都應該加返咁樣嘅一條附加規則：「凡係帶有『弋』或者『戈』部件嘅字（包括呢兩個字本身）要攞補碼時，一律考慮咗位於左下方嘅部件先，然後先至去考慮喺『𫠠』或者『𭠍』攞補碼」。咁樣一嚟所有帶「弋」或者「戈」嘅字就都完整咁解釋得到喇。
• 有四個字，存在兩種兩碼字嘅打法：力 DX DY、門 MI MY、牙 XP YP、乙 ZL ZZ。官方文檔又話，同一個字掗住兩個兩碼碼位（加 V 嘅唔算）係浪費編碼空間，並以此為據將部份早期版本嘅兩碼字改咗佢（儘管更改兩碼字嘅「常用度」標準可能有主觀之嫌），但又唔知點解留低咗四個「浪費編碼空間」嘅兩碼字喺度。

其他

• 部份字符繁簡體模式分配欠妥。我有打粵語字嘅需求，例如「瞓」、「劏」等字，明明字形上係繁體，嘸蝦米又規定呢個字必須要轉去簡體模式先打到。

以下講吓幾個奇怪嘅漢語方言¹現象。

ㄣㄥ（en in & eng ing）不分

Wiwi 喺佢篇文「三個怪癖」 度提到佢講嘢嘅時候有ㄣㄥ不分嘅現象。據說呢樣係台灣人嘅普遍現象²，而且其實唔淨止台灣係咁，就連大陸某啲地方（主要係南方）嘅人都有。為咗解決打字方面嘅困擾，大陸的好一啲輸入法甚至有「模糊音」嘅設計，無論打邊種（用戶覺得分唔到嘅）組合都出到字。

耐人尋味嘅係，閩南語有個類似ㄧㄥ嘅韻母（白話字 eng，臺羅 ing），傳統上應該要讀做 [i̯əŋ]，同ㄧㄣ有明顯唔同。喺北方漢語入面，ㄧㄥ韻母往往被讀做 [i̯əŋ] 甚至 [i̯ə̃]，而ㄧㄣ就係 [in]。反倒係一啲其他嘅南方漢語的確存在上述ㄣㄥ不分嘅特徵。

閩南語真係保留入聲嘅語言？

好一啲閩南沙文主義狂熱份子自詡閩南語係「保留入聲」嘅古漢語。但據我一個粵語母語者嘅個人觀察，台灣嘅閩南語使用者實際上普遍存在入聲脫落嘅現象，好多字典入面標明係入聲嘅字已經被發音到同開韻尾冇乜分別，除非下一個字以零聲母開頭形成聯誦。不過少數字正腔圓嘅人又真係有好好將入聲韻尾讀出嚟。語言隨住時間推移而出現自然變化係件正常嘅事，但係唔應該將某啲正喺度變化（且瀕臨消失）嘅特徵誇大成某語言存古嘅證據。

想節能，輪胎能

好多年前有一個廣告當中有句對白「想節能，輪胎能」，因為代言人古天樂普通話太差而被空耳成奇奇怪怪嘅嘢。不過耐人尋味嘅係，喺普通話同埋標準粵語當中，「輪」跟「能」都係唔同音㗎，反而係一啲鄉下地方嘅粵語方言係分唔到。古天樂喺講粵語嘅時候應該都係分到嘅~~（如果唔係一早就被聽出口音喇）~~。順帶一提，「出」同「七」嘅歸併同上述嘅歸併其實是平行嘅，於是「出街瞓」就變咗做「七街瞓」。

粵語嘅平翹音

唔知有冇人深入探究過呢個疑問。話說 100 年前嘅廣州話係有分平翹音嘅（雖然所謂嘅翹舌音，捲舌幅度遠遠少過北方漢語，若干字歸類同現代標準漢語³唔同），而家嘅標準粵語就唔再分。好多文獻寫「而家統統讀做平舌」，我是好懷疑嘅。根據我自己嘅個人語感、以及對身邊人發音嘅觀察，大多數香港人（冇留意大陸嘅）嘅粵語發音當中實際上係有兩套塞擦音㗎，但唔再構成音位對立，形成同位異音（allophone，少數人係自由變體 free variation），喺「圓唇元音」（粵拼 o, oe, eo, u, yu）前讀作 [tʃ tʃʰ ʃ]，而喺「非圓唇元音」（粵拼 aa, a, e, i）前讀作 [ts tsʰ s]。⁴假如唔遵守上述法則，雖然唔會影響理解，但可能會被認為口音同一般香港人唔一樣。

💡 集思廣益！

唔知各位讀者有冇想增補嘅項目？歡迎透過電郵或私訊向本人提出！

1. 打尖
2. 隨地便溺
   • 實際上呢個係一種極其古老嘅標記領地手段，喺唔同嘅物種都有發現類似嘅行為，佢啲歷史遠遠超過五千年。另可參考「世界都是中國的」。
3. 喺公眾場合大大聲睇抖音／小紅書
   • 播得夠大聲先可以畀人注意並領略到中華文化嘅奧妙！
4. 喺異國他鄉迫人講普通話
   • 中國人鍾意喺異國他鄉迫人講普通話，哪怕對方個樣根本就唔似華人。
   • 你整遊戲、寫漫畫嗰陣，你冇出中文翻譯嘅話，你就係唔關照中文玩家。
5. 隨機被乳滑
   • 古語有云：人生中必定會經歷嘅三樣嘢：出生、死亡同乳滑。
6. 大興核酸
7. 世界都是中國的
   • 中國，一點也不能少！

💡 BlogBlog 同樂會！

呢篇係我嘅「BlogBlog 同樂會 - 2026 年 3 月」嘅投稿文章。今個月嘅主題係「理想的日常」，由 Alex Hsu 主持。如果你有自己嘅部落格，歡迎一起嚟參加！

理想嘅作息

1. 我之前有喺另一篇文度提過，本人嘅生理時鐘處於一個極其微妙嘅狀態，導致我喺尋求「正常」（合乎社會常規）嘅工作極度困難。我自己就曾經嘗試強行堅持咗朝十晚六嘅返工模式幾個月，睡眠狀況都仲係好飄忽，並唔總係喺嗰種適宜返工嘅狀態。但係我又唔鍾意喺深夜出門（感覺唔太安全）。睇嚟我只能去搵一些 freelancer 性質的工作？不過以香港而家嘅經濟環境而言，呢種性質嘅工而家已經唔係咁容易搵到喇，好難以咁樣嘅工去長期維持生計（呢一點得到咗長期以 freelance 作為主要收入來源嘅友人證實）。當然如果能將自己嘅生理時鐘較返正常咁就最好，但係我又應該點做呢？唔通要用醫療手段介入？
2. 我一直以來都唔係一個鍾意運動嘅人，甚至可以話係有啲討厭。可能係我嘅體能狀況差得滯。聽講咁嘅諗法好違反社會常規，唔知係咪需要矯正。當然如果社會上嘅其他人願意接受我咁樣嘅諗法咁就最好。

理想嘅人際關係

我嘅人際關係一直都係澩澩嫪嫪（laau2 laau2 gaau6 gaau6） 。或者我應該搵啲團體活動畀自己充實一下嘅。但係喺我討厭運動嘅前提下，我搵得到嘅活動種類就比較有限喇。而且我對陌生人嘅信任度好低，我自己一個出去搵合適嘅團體活動好怕會遇到騙子，所以我基本上只會透過僅有嘅人際網絡嘅介紹先會主動參加。而且喺我搵得到穩定嘅工作之前，我亦都唔可以太過燒錢。

不過我又唔鍾意參加人數太多嘅團體活動，如果唔係我好容易會變電燈膽。兩三個人一齊係對我嚟講最舒服嘅狀態。

理想嘅社會制度

1. I 人友善：雖則話我一直都有離開香港去外國生活嘅憧憬，不過礙於經濟因素喺可見嘅將來唔係咁可行。不過我唔知點解總係感覺歐美社會嘅運作方式唔係咁 I 人友善，喺歐美地區生活就意味住有更多需要我面對面同人交流嘅場合，而呢樣正正係我唔係咁擅長嘅。我唔知道有啲咩地方係啱我去闖下嘅。
2. 理想嘅工作環境：我係嗰啲唔係咁適應到一日就淨係得返工、放工同休息，生命被大量枯燥乏味嘅工作掗住、唔太重視 work-life balance 嘅生活模式，所以我未必好應付到全職工作？另外我自己偏好嘅工作風格係，如果我見到一樣嘢／一件事而家嘅 implementation 喺 suboptimal 嘅，而我又能諗到一啲具建設性嘅建議嘅話，我會期望我能夠對呢個問題積極發表意見，哪怕佢係我工作範圍之外嘅嘢。
3. 理想嘅工作效率：一個理想嘅社會，各項服務都應該具備良好且完善嘅 customer service。好唔好彩嘅係，我呢個人冇乜耐性，於是好容易就變成咗「律己以寬、待人以嚴」嘅狀態。我自己就有過好幾次需要搵 customer service 嘅狀況但對方工作效率好低之餘仲搞唔掂個問題，最後個問題搞唔掂不特只，仲搞到我情緒好鬼死差。

理想 = 唔現實？

寫到一半嗰陣留意到 Noa 同 Wiwi 提到，喺教育部國語詞典入面，「理想」嘅相反詞係「現實」。常言道「理想很豐滿，現實很骨感」，有得就一定必有其失。睇嚟或者我呢個理想係好難實現㗎喇。

結語

因為趕工嘅緣故，文章內容組織得唔係咁好，我以後可能會再原地更新呢一篇文。

我對於理想嘅世界、理想嘅社會制度，其實仲有啲更激進嘅諗法，不過我就唔喺度公開講喇，費事邊日呢個部落格或者就唔響處喇。