最近「Wiwi 部落格宇宙」出現咗好幾篇討論台灣高職嘅文章：
- Eo《後悔讀高職》
- JN《讀高職是我一點都不後悔的事情》
- ikuka《讀高職不代表我成績差》
- 黃碩人《高職 FAQ》
等我都嚟講下香港嘅教育制度係點樣樣嘅。
喺香港，主流高中都係可以揀科嘅。揀好科之後，除咗中英數通（或者話後來嘅公社科）以及兩到三個選修科目之外，冇揀嘅科以後就真係唔使再掂喇。所以我就真係完全唔使諗上到高中之後原本唔太擅長嘅文科類科目要點搞。
……除非，你成績嘅缺口出喺中英數通度。我自己嘅狀況係數學唔錯，英文還好，中文同通識墊底，但數學同各種理科類選修科嘅成績亦都未算係特別標青（DSE 冇摘到星），屬於比較罕見嘅類型，喺香港教育系統入面唔係好搵到我嘅位置1。於是我喺 DSE 炒咗中文之後，被迫同無數炒英文嘅人一齊讀英語進修課程同高級文憑課程，哪怕我原本嘅英語程度唔算太差2，係幾咁荒謬。