Fantasies 幻想 on AngeCI’s Blog

個人品牌網域

Sun, 03 May 2026 10:12:36 +0000

呢個網站開咗兩個月喇，一直都冇自有網域¹，今日嚟討論一下揀域名嘅話題。

我當然知道 GitHub Pages 可以綁定自定義網域，我而家冇咁做純粹係懶得使錢去買個新網域啫。

`.com` 域名嘅偏好

「Wiwi 部落格宇宙」入面嘅好一啲部落格都對 .com 域名有強烈偏好。

在網路時代，.com 被佔走，就像名字被佔走一樣。

——Alex Hsu《工程師爸爸如何幫小孩取英文名字》

JN 有兩篇文（1、2）提到網域問題，他自己就係用緊 .com 域名。
Wiwi 為「推坑」主題所投稿嘅其中一篇文，就提到「半夜較鬧鐘爬起身搶 .com 域名」呢回事。
Alex Hsu 提到佢使咗 USD $1700 買咗而家個 .com 域名。他喺另一篇文表達咗對 [真名].com 域名嘅強烈偏好。
域名買咗落嚟，仲要養。Eddie Lv 提到，養一個 .blog 域名每年要燒 USD $2600，令他果斷放棄，最終都係買咗 .com 域名。

頂級域名鄙視鏈

有啲人心目中有個「頂級域名鄙視鏈」，大概係咁樣：

.com > .net/.org > gTLD > ccTLD

按照定義，所有兩個字母嘅頂級域名都係「國家頂級網域」（ccTLD）。按照這條鄙視鏈，光鶯社羣位於呢條鄙視鏈嘅底部。

就喺唔係好耐之前，7-zip 就被爆出.com 域名遭到搶註做釣魚網站嘅事件，凸顯咗知名度高嘅服務註冊 .com 域名嘅重要性。

另外如果你要諗住自架郵件伺服器嘅話，實際上電子郵件服務喺好多年前就已經被大量嘅 spam mail 玩成咗信任死鎖，自架郵件服務好難出信㗎。據說 .com 域名發出嘅郵件送達率會高啲，而推出時代近啲嘅 .win、.xyz 之類嘅域名，由於容易被人拎嚟做奇怪嘅嘢，比較容易被其他網站不信任。

我嘅域名規劃

養一個域名係件好燒錢嘅事，齋為一個部落格買一個域名並唔划算。就算邊日呢個網站開始有自有網域，我應該都會將個部落格擺去 b.example.com 呢個樣嘅 subdomain 度。事實上我心入面已經有一個比較詳盡嘅 subdomain 規劃清單：

a/ai: 自架私人 AI 伺服器（如果邊日有嘅話）

b: 部落格

f: 論壇、留言板

g: GitHub Pages／自架 Gitea？（如果邊日有嘅話）

i: 圖床

m/mc: Minecraft 伺服器

ms?: 自架 Mastodon？（如果邊日有嘅話）

s/t?: 短網址

sx: 自架 searx（如果邊日有嘅話）

v: 自架 PeerTube（如果邊日有嘅話）

域名選擇

問題來喇，我應該揀點樣嘅域名呢？

有啲人鍾意用真名嚟做域名。Alex Hsu 就提過他鍾意咁嘅域名²。我嘅話會考量到身份隔離嘅問題，就算我買咗用我真名構成嘅域名，我都唔會拎嚟畀我寫呢一個部落格嘅身份用。

另外，.io 嘅前景唔係好明朗，喺佢嘅未來走向確定之前，最好唔好買新嘅 .io 域名。

暗網域名

光鶯社羣有啲會用暗網嘅成員，當中有為成個組織配置暗網域名嘅成員。

Tor、I2P 有現成嘅挖域名工具。甚至有人挖咗一堆 yjspi 開頭的 .onion 域名。
Yggdrasil 本質上就係一層虛擬嘅 IPv6 地址，可以隨便綁定任意域名，我整個 y/ygg 嘅 subdomain 就得。
Lokinet 可能冇現成嘅挖域名工具。

首頁列出嘅嗰個僅供收信嘅信箱，其實都唔係完全由本人所擁有，佢只係隸屬於一個我有份參與組建嘅團體。 ↩︎
雖然實際上華人嘅英文名可以是但改，所以實際上所謂嘅「真名域名」都係包含到姓氏㗎啫。我身邊甚至有會根據唔同環境轉換唔同嘅英文名嘅人。香港嘅身份證度都有羅馬字，而大部份華人嘅身份證上面嘅羅馬字都冇包含英文名。 ↩︎

理想的日常

Thu, 26 Mar 2026 10:49:18 +0000

💡 BlogBlog 同樂會！

呢篇係我嘅「BlogBlog 同樂會 - 2026 年 3 月」嘅投稿文章。今個月嘅主題係「理想的日常」，由 Alex Hsu 主持。如果你有自己嘅部落格，歡迎一起嚟參加！

理想嘅作息

我之前有喺另一篇文度提過，本人嘅生理時鐘處於一個極其微妙嘅狀態，導致我喺尋求「正常」（合乎社會常規）嘅工作極度困難。我自己就曾經嘗試強行堅持咗朝十晚六嘅返工模式幾個月，睡眠狀況都仲係好飄忽，並唔總係喺嗰種適宜返工嘅狀態。但係我又唔鍾意喺深夜出門（感覺唔太安全）。睇嚟我只能去搵一些 freelancer 性質的工作？不過以香港而家嘅經濟環境而言，呢種性質嘅工而家已經唔係咁容易搵到喇，好難以咁樣嘅工去長期維持生計（呢一點得到咗長期以 freelance 作為主要收入來源嘅友人證實）。當然如果能將自己嘅生理時鐘較返正常咁就最好，但係我又應該點做呢？唔通要用醫療手段介入？
我一直以來都唔係一個鍾意運動嘅人，甚至可以話係有啲討厭。可能係我嘅體能狀況差得滯。聽講咁嘅諗法好違反社會常規，唔知係咪需要矯正。當然如果社會上嘅其他人願意接受我咁樣嘅諗法咁就最好。

時間	有乜做
11:00-12:00	起身、食 brunch
12:00-13:00	睇書（雖然我手頭上冇乜實體書）、創作、研究各種我有興趣嘅知識、開始前往返工嘅路上（如果有嘅話）
13:00-18:00	約會或團體活動、或者匿埋喺屋企打機、編程或者喺主流平台度頹（雖然所謂嘅主流平台幾乎剩低 YouTube 喇，雖然我身邊嘅朋友偶爾會 send 啲 Instagram 或者 Threads 嘅嘢畀我睇）、到達工作地點開始返工（如果有嘅話）
18:00-19:00	放工返屋企（如果有嘅話）
19:00-21:00	沖涼、食晚餐
21:00-02:00	繼續鑽研興趣、編程或者打機
02:00-11:00	瞓覺

理想嘅人際關係

我嘅人際關係一直都係澩澩嫪嫪（laau2 laau2 gaau6 gaau6）。或者我應該搵啲團體活動畀自己充實一下嘅。但係喺我討厭運動嘅前提下，我搵得到嘅活動種類就比較有限喇。而且我對陌生人嘅信任度好低，我自己一個出去搵合適嘅團體活動好怕會遇到騙子，所以我基本上只會透過僅有嘅人際網絡嘅介紹先會主動參加。而且喺我搵得到穩定嘅工作之前，我亦都唔可以太過燒錢。

不過我又唔鍾意參加人數太多嘅團體活動，如果唔係我好容易會變電燈膽。兩三個人一齊係對我嚟講最舒服嘅狀態。

理想嘅社會制度

I 人友善：雖則話我一直都有離開香港去外國生活嘅憧憬，不過礙於經濟因素喺可見嘅將來唔係咁可行。不過我唔知點解總係感覺歐美社會嘅運作方式唔係咁 I 人友善，喺歐美地區生活就意味住有更多需要我面對面同人交流嘅場合，而呢樣正正係我唔係咁擅長嘅。我唔知道有啲咩地方係啱我去闖下嘅。
理想嘅工作環境：我係嗰啲唔係咁適應到一日就淨係得返工、放工同休息，生命被大量枯燥乏味嘅工作掗住、唔太重視 work-life balance 嘅生活模式，所以我未必好應付到全職工作？另外我自己偏好嘅工作風格係，如果我見到一樣嘢／一件事而家嘅 implementation 喺 suboptimal 嘅，而我又能諗到一啲具建設性嘅建議嘅話，我會期望我能夠對呢個問題積極發表意見，哪怕佢係我工作範圍之外嘅嘢。
理想嘅工作效率：一個理想嘅社會，各項服務都應該具備良好且完善嘅 customer service。好唔好彩嘅係，我呢個人冇乜耐性，於是好容易就變成咗「律己以寬、待人以嚴」嘅狀態。我自己就有過好幾次需要搵 customer service 嘅狀況但對方工作效率好低之餘仲搞唔掂個問題，最後個問題搞唔掂不特只，仲搞到我情緒好鬼死差。

理想 = 唔現實？

寫到一半嗰陣留意到 Noa 同 Wiwi 提到，喺教育部國語詞典入面，「理想」嘅相反詞係「現實」。常言道「理想很豐滿，現實很骨感」，有得就一定必有其失。睇嚟或者我呢個理想係好難實現㗎喇。

結語

因為趕工嘅緣故，文章內容組織得唔係咁好，我以後可能會再原地更新呢一篇文。

我對於理想嘅世界、理想嘅社會制度，其實仲有啲更激進嘅諗法，不過我就唔喺度公開講喇，費事邊日呢個部落格或者就唔響處喇。