我喺 2026 年 3 月就已經有主持 BlogBlog 同樂會嘅諗法，當時最初係排咗喺 ikuka 後面，只係我喺 9 月份嘅現實工作有啲忙，就將主持時間褪咗一個月去咗 10 月。

呢個網站存在嘅其中一個理由，喺保存各種易於閱讀嘅筆記，包括但唔限於各種語言嘅學習同推廣。目前我呢個網站好似幾多語言學文章，不過其實我本身嘅專業可以話係同語言學完全一啲關係都冇。

唔知大家有冇留意到，呢個網站實際上係多語嘅，雖然好多時候我往往都係先發佈其中一種話，以後有時間先再慢慢翻譯其他嘅話。

主題：「語言嘅習得、傳承同推廣」

2026 年 10 月嘅主題係：「語言嘅習得、傳承同推廣」！

語言係一種神奇嘅現象。人類語言嘅發展程度喺自然界中絕無僅有。大家每日都會接觸到語言，可能係口語或者文字（甚至手語），但同時人類對於語言嘅起源卻近乎一無所知。語言習得嘅過程亦都係非常奧妙，嬰孩可以喺近乎零干預之下學識佢哋嘅第一語言，但過咗某個年齡之後，新語言嘅習得過程就變得截然不同，使到成人學習外語變得極其困難。各位喺義務教育當中都會研習多種語言，或者會自主學習更多的外語（甚至人工語言同程式語言）。或者你哋當中有一啲人，係生活喺母語、家庭語言同社會語言唔一樣嘅社羣。各位對於語言嘅研習有咩體會？

面對住本土語言衰落嘅境況¹，各位格友們對此有咩感想、意見或者建議？事實上下面嘅「本土語言嘅發展同保存」就係我最一開始擬定嘅主題。

題外話：講開本土語言，而家網絡上似乎唔係好搵得到適合零基礎嘅外國人學習嘅台語／閩南語教材，與之相關嘅自然語言處理系統都仲係喺發展階段，或者呢個係個巨大嘅市場缺口。或者將來會考慮嘗試整返個自研教學平台。

人類語言嘅複雜程度，亦絕非幾句簡單的嘅規則就講得通嘅。呢種奇特嘅現象亦致使設計產生到流暢嘅自然語言嘅機器程式變得異常複雜，人類直到近幾年先算係攻克咗相關技術。

選題靈感

以下有啲可供參考嘅選題靈感。

💬 本土語言嘅發展同保存

呢個係我一開始擬定嘅題目。後來同其他人討論過覺得原本嘅題目有啲太窄，就將題目拓寬咗下變做而家咁樣。

• 👨‍👩‍👧‍👦 家庭同社會層面嘅語言政策：大家「如果」打算組織家庭、生兒育女嘅話，打算對家庭、子女同社區實行點樣嘅語言政策？
• 🗳️ 政府層面嘅語言政策：假設你有能力從政府層面制定政策，你會同你嘅國民制定點樣嘅語言政策？
• 💬 本土語言嘅用字考究、用語、俗語等嘅介紹？ 真係要寫嘅話我應該可以整到成個文章分類出嚟，只係我目前有啲懶得動筆。
• 👴 尋根：喺語言斷層出現之後，重拾祖輩語言嘅心路歷程？
• 🏴🏫 極端嘅語言復興主義：想像一下一個三戰之後嘅世界，假如你係呢個時代嘅細路，被一群政治狂熱份子送去「本土語言學校」強迫接受本土語言教育（甚至本土語言教全科），你會唔會感到痛苦、追唔上學習進度，然後開始討厭返學？甚至因為國語被視為殖民者嘅語言，搞到本土語言講唔掂嘅成年人都被強迫接受「再教育」？
• 📱 科技同當代傳播：
  • 網路迷因冋次文化語言：網路用語、Z 世代流行語或迷因點樣快速重塑傳統語言？本土語言係咪能夠透過「迷因化」獲得新生？
  • AI 時代嘅語言翻譯同危機：當即時翻譯技術普及，學習非母語或維護本土語言嘅動機會唔會被削弱？
• 🎭 文化、藝術與身分認同：
  • 流行文化中的本土語言：例如本土語言歌曲、電影或戲劇點樣改變大眾對呢種語言嘅刻板印象？
  • 雙語／多語家庭嘅混亂同樂趣：喺多語環境下長大嘅「code-switching（語言切換）」日常，例如一句嘢溝埋三種話嘅奇妙溝通模式。
  • 消失嘅字詞同記憶：有邊啲詞彙因為時代變遷（如舊時農具、古老習俗）而喺現代語言中徹底消失？咁代表咗乜嘢文化嘅遺失？
• 💻 低資源語言嘅自然語言處理：呢個係比較偏向技術層面嘅面向。一啲本土語言嘅自然語言處理技術發展得比較遲，各位對此有無咩見解？可能嘅實作方向或者產品都得。各位點樣投資本土語言／低資源語言嘅語音合成或者辨識、斷詞、標音、翻譯、TTS/RVC 音源等技術？
• 🩸🔫🙊😱 定還是，比起本土語言嘅保育，你更樂於以強勢語言打壓同侮辱本土語言？

🌐 評論各國政府嘅語言政策

對各國政府語言政策嘅評論。 可以係歷史上或者係現在進行式嘅。

• 📖 目前所有嘅華文地區都要求嘅義務教育階段研習文言文。聽講日本嘅義務教育都會修讀文言文內容。學習文言文喺現代社會有冇實際用處？
• 🖋️ 漢字書法係咪反人體工學㗎？應唔應該將漢字書法納入到必修嘅義務教育當中？

📚 學習語言嘅經驗

• 💬 你係咪曾經有被要求學習多種語言，然後發現學習進度根本追唔上嘅經驗？
• 💬 你最鍾意嘅語言、學過嘅語言、最想學嘅語言、學咗好耐都仲係學唔掂嘅語言？
• 🧑‍🏫 遇過嘅語言老師、識過嘅唔同語言嘅朋友
• 📚 自己私藏嘅語言學習法

🧠 認知同心理學

• 語言點樣塑造思考模式：用唔同嘅語言講嘢嗰陣，係咪會感覺自己轉咗去「第二人格」？
• 非聲語言同身體語言：手語、肢體動作或微表情喺唔同文化入面嘅差異同溝通體驗。

❓ 其他

• 🗣️ 因為語言／口音唔同而發生嘅趣事、culture shock 或者歧視經驗
• 🐱 同寵物溝通嘅語言、使用唔同語言（甚至程式語言）嘅經驗
• 💡 各種有關語言嘅冷知識，似乎同幾個月前的同樂會主題有啲重疊（但我唔會禁止喺往期同樂會投稿過嘅舊文重複投稿！）。
• 對語言起源嘅討論
• 創造語言（conlang）嘅經驗

以上提示僅供參考，參與者可以自由發揮，只要內容同「語言嘅習得、傳承同推廣」有關就得。

參加方式

1. 喺自己嘅網誌度寫一篇同「語言的習得、傳承與推廣」有關嘅文章（可以嘅話，複製下面嘅文字放喺文章開頭，但唔強制）

   📝 喺投稿文章開頭放呢段文字（非強制）

   呢篇係我嘅「BlogBlog 同樂會 - 2026 年 10 月」嘅投稿文章。今個月嘅主題係「語言嘅習得、傳承同推廣」，由 AngeCI 主持。如果你有自己嘅部落格，歡迎一起嚟參加！

   如果你用 markdown 語法寫作，可以直接複製下行：

   > 呢篇係我嘅「[BlogBlog 同樂會 - 2026 年 10 月](https://blogblog.club/party)」嘅投稿文章。今個月嘅主題係「[語言嘅習得、傳承同推廣](https://angeci.github.io/blog/yue/blogblog-party-languages/)」，由 [AngeCI](https://angeci.github.io/blog/yue/) 主持。如果你有自己嘅部落格，歡迎一起嚟參加！
   

2. 將文章連結（唔係全文喔）寄去我嘅信箱 angeci (at) ltgc.cc ²

3. 信件主旨可寫「BlogBlog 同樂會投稿：語言嘅習得、傳承同推廣」

   信件內文參考格式：

   [文章名稱](https://blog-post-url) - 投稿人稱呼
   
   投稿附言（可選）
   

   如果您投稿嗰陣冇向本人清晰指明投稿人稱呼嘅話，我會嘗試喺往期投稿名單搵配對。如果配對唔到嘅話我就可能只能夠從電郵標頭或者網誌標題求其框喇。

4. 記得喺截稿日（2026-10-31）³之前寄出！（即日起就可以開始投稿）

Q & A

• Q1: 係咪冇自己嘅部落格都參加得？

  A1: 如果係「自己」嘅部落格就最好。但文章如果係喺 Substack、Medium、方格子都 OK。唔接受社群媒體投稿（如 Facebook、Instagram、Threads、X）。請確保投稿文章喺截稿時公開睇到。如果我喺中途或截稿時發現文章睇唔到嘅話，我會嘗試通知有關嘅投稿者，一段時間之內沒有恢復／更新嘅話我會將失效／睇唔到嘅連結直接剷走。

• Q2: 係咪一定要寫新文章？可唔可以拎之前寫嘅舊文章參加？

  A2: 可以拎過去嘅舊文章參加㗎！如果你個部落格度咁啱有符合主題嘅文章，可以直接投稿，唔使因為文章係舊年寫落嘅就唔好意思拎出嚟。只要符合「語言嘅習得、傳承同推廣」呢個主題嘅文章都可以參加。（但為同樂會專門寫一篇新嘅文章，會更有參與感喔！）

• Q3: 投稿有冇篇數上限？

  A3: 原則上不設限⁴，呢個可能係歷屆同樂會以嚟最佛心嘅一次喇 ，但都請唔好刻意灌水滋擾我唔該🤣。

• Q4: 投稿語言有冇限制？

  A4: 原則上冇限制，不過 BlogBlog 同樂會嘅投稿活動一般以繁體中文為主。視乎本人對不同語種嘅熟悉程度，我有可能需要依賴機器翻譯服務嚟理解閣下嘅外語投稿。不過本人台語程度較弱⁵，若閣下投稿「只」有台語嘅文章而未有提供翻譯（翻譯要公開或者私下提供都得），我將會需要依賴機器翻譯服務輔助理解。

• Q5: 投稿咗幾耐會收到回覆？⁶

  A5: 儘可能喺一兩日內覆啦[^6]。如果我咁啱唔太得閒或者您喺臨近截稿期限嗰陣投稿嘅話，我可能會先出一封回信確認收件，之後先另外補上針對文章內容嘅回應（或者直接喺回顧文度覆）。您亦可以隨時造訪本頁嘅投稿文章列表檢查本人係咪已經確認收件。不過我而家用緊嘅係免費郵箱服務，唔保證出回顧文嘅時候會統一出 newsletter 畀大家。

• Q6：投稿名單幾耐會更新一次？

  A6：喺初時文章唔多嗰陣，我可能會儲夠一定篇數或者等到網誌有其他內容更新先至順便更新呢度。但我會盡快回覆郵件確認收件。去到後期投稿速度變高嗰陣我諗我就會每日更新呢度嘅投稿名單喇，除非嗰日我唔得閒。

• Q7：可唔可以投稿立場較為偏激嘅文章？

  A7：我唔會自動拒絕立場偏激嘅文章投稿，但我可能會喺文章連結側邊標示立場激進，請各位讀者做好玻璃心碎裂嘅心理準備。同本人立場相左嘅文章未必能獲得來自本人的深度回應。

已經投稿嘅作者清單（持續更新）

活動期間，呢度會持續更新投稿咗嘅文章連結，歡迎大家互相閱讀、交流、訂閱！最終整理同回顧文章會喺 11 月初發佈。

以下係目前參與文章嘅連結列表（按投稿順序）：

1. 淺談數個漢語方言現象 - AngeCI
2. 論學習文言嘅必要性 - AngeCI
3. 論漢字書法教育 - AngeCI
4. 多語部落格 - AngeCI
5. 統一譯名 （溫和版、激進版） - AngeCI
6. Alex Hsu 打壓本土語言 - AngeCI ⚠️ 內容偏激注意
7. 二十年前部落格圈的簡體繁體議論 - 我
8. 有關片名翻譯的問題3 - 我
9. 失語症患者重新學會說話，算是重新學一種語言嗎？ - 神經沒問題
10. 跌跌撞撞的台語學習歷程 - Wen
11. 學「台語」，真的好嗎？（偏激A版、偏激B版、中性版） - Tommy
12. 親切與親切 - Tomo
13. 如何考過N1 - YangBear
14. 臺灣人學注音 - 拍拍
15. 語言是人類絕無僅有的能力！嗎？ - Tomo
16. 誰有資格被稱作臺灣台語 - Eddie Lv
17. 文言文和古诗的现代教学问题及前途 - 心是灵 Xinsl
18. 賽德克語 - 小麥
19. 靠腰 feat. BlogBlogParty 10 - Niugnep
20. My linguistic history - 物靈
21. 從語言腐敗中長出詭辯機器 - 開源 lib（
22. 語言是工具，使用在意念 - RayrrrrrR
23. Lūn Tâi-oân Chèng-tī Jîn-bu̍t Tâi-gí Thêng-tō͘ - Lí Ka-io̍k
24. 四種語言經驗 - Andy
25. 去 AI 味 - Boring Game
26. Go！Go！語言城堡！ - 小皮球
27. Go！Go！語言城堡！New 改編！ - 小皮球
28. 語言的習得、傳承與推廣 - Haruo Wang
29. Bopomofo你知道嗎? - Daisy黛西
30. 學英文的工具推薦 - 阿標
31. 我kap臺語之間ê關係——Holopedia (閩南語維基百科) kap故事創作 - Yoxem
32. 越來越大陸？ - Cheuk
33. 我喜歡聽的那些台語歌曲 - j2hongming
34. 食道？ - 李俊緯
35. 窄式學習法 - Tian-Yan
36. 語言學習 - JN
37. 重修中文？ - SuperGrey
38. Anki-複習的力量，語言學習工具，影響我的一生 - 范剛哲
39. 耳朵看不見 - O’Oh 麵麵
40. 漢字存廢之辯 - AngeCI
41. 香港語言狀況發展史 - AngeCI
42. 多元文化的马来西亚人 - mrkeat
43. 本名、つばさ、Tim與鴕鳥 - 鴕鳥
44. 如果國三那年就有翻譯機 - 鴕鳥
45. 我學英文單字的方法 - 蘿蔔
46. 中國用語過敏 - ㄅㄨ
47. 語言的習得、傳承與推廣 - PuzeLee
48. 一些現實語言文化雜談 - ERNE

• 最後更新：2026-11-02